Vllaznia do të luajë sërish përballë një rivali direkt për titullin këtë fundjavë, ku pas ndeshjes me Egnatian, shkodranët do presin në shtëpinë e tyre Dinamon.
Me duelin që do luhet ditën e shtunë në orën 17:00 dhe vlen për raundin e 11-të të Superiores. Një ndeshje direkte përballë një kundërshtari që me të vërtetë i ka hapur “telashe” kuqebluve në sezonet e fundit. Ku edhe humbjen e parë të këtij edicioni, kanë qenë kryeqytetasit që ia kanë shkaktuar shkodranëve.
Kjo në javën e dytë të kampionatit, me Dinamon që mposhti Vllazninë me rezultatin 3-1. Këtë e tregojnë edhe statistikat e sezonit të shkuar, që shohin Dinamon me një avantazh ndaj kuqebluve. Kështu dy skuadrat janë përballur plot 7 herë edicionin e shkuar, në të gjitha kompeticionet përfshirë kampionatin, kupën dhe duelet e “final 4”. Në këtë mënyrë blutë nga kryeqyteti gjatë sezonit të rregullt kanë fituar 2 herë ndaj Vllaznisë. Në shifrat 2-1 në javën e 7-të dhe në shifrat 2-3 në javën e 16-të të edicionit 2024-25. Një duel ka qenë me rrjeta të paprekura në shifrat 0-0 në javën e 25-të dhe një triumf i Vllaznisë me rezultatin 3-0 në raundin e 34- ët të edicionit të shkuar.
Dy skuadrat u përballën edhe në gjysmëfinalet e kupës së Shqipërisë për sezonin 2024-25, ku takimi i parë në Shkodër përfundoi 0-0, teksa Dinamo fitoi në kthim në Elbasan me rezultatin spektakolar 4-3. Duke siguruar kështu kalimin në finale më pas. E ndërsa përballjet mes dy ekipeve nuk u ndalën as në “final 4” për edicionin 2024-25. Ku kësaj radhe ishte Vllaznia fitimtare, pas shifrave 2-1 në favorin e tyre do ishin shkodranët. E në këtë mënyrë kuqeblutë kaluan në finalen e kampionatit të shkuar.
Por, së bashku me triumfin e këtij edicioni në javën e dytë të tijin, shifrat e 8 ndeshjeve të fundit mes dy ekipeve flasin në favor të Dinamos. Me “nëndetësen” që ka marrë 4 fitore, 2 ndeshje kanë përfunduar në barazim dhe 2 suksese shkojnë në favor të shkodranëve. Shifra të cilat të besuarit e Martinit do kërkojnë t’i përmbysin, duke nisur nga kjo e shtunë. Ku jo vetëm “inatet” e së shkuarës, por edhe objektivat e këtij edicioni bëjnë që Vllaznia të ketë si synim vetëm 3 pikët në këtë përballje të radhës ndaj Dinamos.
