Maks Vershtapen del nga Las Vegasi me një skenar që edhe me laps e letër në dorë nuk do ta realizonte më të mirë. Piloti i Red Bullit shkëlqeu në garë, duke fituar Çmimin e Madh, ndërsa dy rivalët e tij të MekLarenit, Lando Norris dhe Oskar Piastri nuk morën asnjë pikë, pasi u skualifikuan për shkak të shkeljeve në makinë. “Shkoi gjithçka mirë. Pas provave nuk isha plotësisht i sigurt se si do të silleshin gomat.
Në start nuk e di kurrë çfarë mund të ndodhë. Unë u nisa mirë, ndërsa Norris u përpoq të mbrohej dhe shkoi gjatë në frenim, ndaj munda të përfitoja dhe për mua ishte perfekte! U përpoqa të gjeja ritmin tim, pashë që gjithçka ishte nën kontroll dhe vazhdova të shkëputesha. Kjo garë zakonisht është e vështirë për ne për shkak të degradimit të gomave, por sot i kishim të gjitha në dorë.
Kisha ritëm, munda të shtyja fort dhe u ndala në ‘pit-stop’ në mes të garës. Gjatë gjithë kohës u ndjeva i qetë dhe munda të shtyja në mënyrë që të mbyllja me një avantazh të mirë pa konsumuar shumë gomat”, ishte komenti i Vershtapenit për garën në Las Vegas. Piloti i Red Bullit, më pas sheh nga eventi i radhës: “Në Katar, pas një jave, do të jap maksimumin dhe do të provoj të fitoj si Sprintin, ashtu edhe Çmimin e Madh. Ka qenë një sezon me ulje e ngritje, por kemi mësuar shumë dhe këto mësime do të jenë të vlefshme për të ardhmen, që të mund të luftojmë për titull që nga fillimi. Tani le të shijojmë momentin dhe pastaj të shohim se çfarë do të ndodhë javën tjetër”, përfundoi katër herë kampioni i botës në F1.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
