Demokratët e Dhomës së Përfaqësuesve në Komitetin Mbikëqyrës publikuan foto dhe video nga ishulli privat i Karaibeve i Jeffrey Epstein. Pamjet filmike hedhin dritë mbi atë që dikur ishte epiqendra e abuzimit të vajzave dhe grave të reja nga i dënuari për krime seksuale.
Disa video tregojnë oborrin e një shtëpie luksoze si vendpushim , të kompletuar me një pishinë, palma dhe një shteg me pamje nga oqeani. Një foto duket se tregon një tavolinë me një dërrasë të zezë: fjalë të tilla si “pushtet”, “mashtrim”, “e vërtetë”, “muzikë” dhe “politikë” janë shkruar në të.
Foto të tjera tregojnë zona të ndryshme, duke përfshirë dhoma gjumi, banjo dhe një hapësirë me mobilje që i ngjan një karrigeje dentisti, ndërsa tregohet edhe një telefon me emra të regjistruar në thirrje të shpejtë, si Darren, Rich, Mike, Patrick dhe Larry.
Sipas CNN, materiali që Komisioni nxori në dritë të mërkurën po publikohet për herë të parë dhe i gjithi është nga ishulli Little St. James në Ishujt Virgjër të SHBA-së.
Publikimi i fotove dhe videove vjen menjëherë pas nënshkrimit të një projektligji nga Donald Trump, i cili detyron Departamentin e Drejtësisë të bëjë publike dokumentet që lidhen me Epstein. Publikimi i të ashtuquajturave dosje Epstein pritet me shumë interes dhe mund të ndodhë në ditët në vijim.
Robert Garcia, një kongresmen demokrat në Komitetin Mbikëqyrës, tha se këto imazhe dhe video ofrojnë një pamje shqetësuese të botës së Epstein dhe ishullit të tij, ndërsa theksoi nevojën për transparencë të plotë në hetimin e vazhdueshëm për krimet e tij.
“Ne po i publikojmë këto foto dhe video për të siguruar transparencën e hetimit tonë dhe për të ndihmuar në krijimin e një pamjeje të plotë të krimeve të tij të tmerrshme“, theksoi ai.
