Trajneri i Luftëtarit, Hasan Lika, ka deklaruar se është i lumtur me fitoren e sotme edhe pse do ta pranonte me kënaqësi edhe nëse ndeshja do të mbyllej në barazim. Duke folur për “SuperSport”, ai theksoi se skuadra do ta kishte të vështirë në vijim, sidomos nëse largoheshin emra si Bregu e Abazaj që janë ndër më të kërkuarit në treg.
Për fitoren e sotme
“Ishte e rëndësishme të marrim pikët për ato lojëra që zhvillojmë e atë që bëmë sot. Djemtë bënë maksimumin, sot pozitive ishte që shënuam e nuk pësuam gol”.
Për rastet e shumta të humbura para portës
“E kam thënë edhe më parë që jemi skuadër që krijojmë shumë, si skuadër dhe individe. Kemi lojtarë që kanë krijuar individualitetet e tyre, si Bregu, Rroca e Abazaja, por u mungon goli, nuk janë golashënuesa. Ata punojnë shumë, por gjërat nuk mund të rregullohen përnjëherë. Përpos kësaj, në një farë mënyre u shpërblyem, duke fituar ndaj Kamzës që na vuri në vështirësi shumë herë me kundërzbritje se ka lojtrë të fortë si Plaku, Raçiç, etj”.
Për problemet në mbrojtje
“Ne jemi skuadër që krijojmë dhe skuadra të tilla zakonisht kanë probleme në mbrojtje. Ne kërkojmë të përmirësohemi, si skuadra të tjera. Por më tepër se ekipet e tjera, ne kemi nevojë të bëhemi skuadër më me ekuilibër, më organike në lojë dhe shpresojmë t’ia arrijmë. E dimë që nuk është e lehtë që brenda janarit të gjejmë këto mundësi, por përpjekjet do t’i bëjmë”.
Për rastin e penalltisë në pjesën e parë
“Mendoj se ishte penallti, kishte elementë të penalltisë dhe po them që nuk kemi marrë penallti deri tani. Ndonjëherë edhe gabojmë, por mendoj se ishte. Kishim ardhur për pikë, do të isha i kënaqur edhe me një pikë. Por kishim organizim dhe luftë për të marrë tri pikët. Ashtu siç filloi momenti jo i mirë për Gjirokastrën kur u mund nga Kamza, ky është momenti më i mirë që të ktheheshim”.
Për largimin e mundshëm të Bregut dhe Abazajt
“Bregu është një futbollist shumë i mirë, ka një rritje shumë të mirë, sigurisht ka nevojë akoma të përmirësohet në ecurinë e lojës, të jetë më golashënues. Por gjithsesi jemi të kënaqur, ai është një moment që si Bregu, si Abazaj, janë ndër më të kërkuarit. Kjo është edhe meritë e skuadrës. Por nuk di se çfarë zgjidhje do të bëjë Bregu.
Lojtarët kanë objektivë që të shkojnë të përmriësohen diku tjetër, me një grup më të mirë, apo nivel më të lartë, të bëjnë hopin cilësor. Për këtë punojnë të gjithë në Shqipëri. Janë lojtarë të mirë, nuk e di si do të shkojnë problemet deri në fund të janarit. Por sa i përket mundësisë për përforcime, do të bëjmë. Do të jetë e vështirë të gjejmë një Bregu ap Abazaj tjetër, por do marrim lojtarë që t’i shërbejnë skuadrës”. /vipsport.al/
