Aktori i njohur britanik Idris Elba ka surprizuar publikun duke njoftuar se po mendon seriozisht të heqë dorë nga aktrimi në të ardhmen, për t’u fokusuar plotësisht në punën regjisoriale. Deklarata u bë gjatë një seance pyetje-përgjigje në Festivalin Ndërkombëtar të Filmit të Detit të Kuq në Arabinë Saudite, ku Elba prezantoi projektin e tij të ri si regjisor, filmin e shkurtër “Dust To Dreams”.
Ky është projekti i tij i parë regjisorial që prej filmit të vitit 2018 “Yardie”, dhe aktori 53-vjeçar theksoi se ambicia e tij është të vazhdojë të ndërtojë një karrierë në prapaskenë. “Shpresoj që fansat e mi të aktrimit të mos zhgënjehen. Përfundimisht, dua të vazhdoj tërësisht me regjinë,” u shpreh ai.
Elba, i cili deri tani ka interpretuar mbi 130 role, tha se ndonëse aktrimin e do ende, regjia i jep atij një dimension tjetër krijues. “Regjia më lejon të tregoj ‘muskuj’ të ndryshëm dhe të përjetoj setin në një mënyrë krejtësisht tjetër. Kjo më jep shumë kënaqësi,” shtoi ai.
Aktori foli shkurtimisht edhe për projektin e tij të ardhshëm si regjisor, “This Is How It Goes”, i cili do të realizohet nga Apple dhe bazohet në dramën e Neil LaBute të vitit 2005.
Gjatë eventit, Elba përgënjeshtroi gjithashtu thashethemet se mund të jetë James Bond-i i ardhshëm. Ai ka deklaruar më herët, në podcastin “Good Hang”, se aktrimin e sheh si privilegj, jo si punë të vërtetë. “Nuk më duket si punë të qëndroj në një set xhirimi,” tha ai.
