Dinamo ka kaluar krizën dhe duket se është në një moment, të cilin nuk e ka pasur asnjëherë këtë sezon. 9 golat e shënuar në dy ndeshjet e fundit, konfirmojnë më së miri se gjërat në kampin kryeqytetas kanë ndryshuar dhe se tashmë kërkohet vazhdimësi edhe për ndeshjen e radhës ndaj Egnatias.
Ndryshe nga sfidat e shkuara që Daja e kishte shpresën te titullarët, ndaj Flamurtarit ishin lojtarët e stolit ata që vulosën fitoren e Dinamos, në një transfertë shumë delikate por që kishte shumë vlera, sidomos me golat e shënuar dhe faktin që porta mbeti e paprekur. Në ndeshjet e mëparshme, edhe Neziri e ka bërë të njëjtën gjë nga stoli, por pa arritur të realizojë kur luan titullar.
FLAMURTARI- Lorenco Vila zhbllokoi sfidën për skuadrën e Dinamos në sfidën e së dielës, duke realizuar golin e dytë personal në dy ndeshjet e fundit. Pas Vilës, ishin Qefalija dhe Xhejms lojtarët që shënuan sërish, duke i dhënë qetësi skuadrës së Dajës dhe për të qenë të bindur se nuk do të ishte një ndeshje me fund dramatik. Të dy lojtarët, nuk kanë pasur ndeshje të shumta si titullar, sidomos sulmuesi Xhejms që edhe nga stoli, është aktivizuar me pikatore këtë sezon. Megjithatë, goli në Vlorë mund të ketë bindur Dajën që t’i japë më shumë minuta dhe ndoshta të kthehet në protagonist të ndeshjeve të ardhshme. Sa i përket Qefalisë, mesfushori kishte një rëndesë muskulare në sfidat e fundit dhe nuk u aktivizua për të mos u rrezikuar. Rikthimi në fushë, duket se i bëri mirë mesfushorit që u rikthye te goli dhe këtë e bëri në një ndeshje shumë të rëndësishme.
GJENDJA E SKUADRËS- Ndeshja me Flamurtarin nuk ka lënë pasoja te Dinamo dhe Daja do të ketë skuadrën e plotë për ndeshjen me Egnatian në kampionat. Veç dëmtimeve që fatmirësisht për Dinamon, nuk kishte, as ndëshkime me kartonë të kuq, nuk pati dhe skuadra do të jetë në gjendje optimale. Të vetmit që rrezikojnë për të plotësuar numrin e kartonëve, mbeten Klevi Qefalija dhe Bakari Gudiabi të cilët janë në kuotën e 3 të verdhëve. Sakaq, me grupin është bashkuar Bernard Berisha që mund të jetë vlerë e shtuar për sulmin dinamovit, ndërkohë që ashtu siç dihet, deri në janar nuk do të jetë Naser Aliji që i është nënshtruar një ndërhyrjeje kirurgjikale.
MBROJTJA- Pavarësisht mungesave të rëndësishme në mbrojtje, si Aliji apo Dita, Dinamo ka kthyer stabilitetin në prapavijë. Në ndeshjen ndaj Flamurtarit, porta e Dinamos qëndroi e paprekur e në fakt, diçka e tillë niste edhe në fazën e parë ku ndaj Flamurtarit, fituan 2-0 e më pas, për më shumë se një muaj nuk pësuan asnjë gol. Një statistikë e tillë, në kampin blu shpresojnë që të përsëritet sërish pasi në këtë mënyrë, skuadra mund të marri pikët që ka lënë pas në këtë fillim të fazës së dytë, pikërisht ndaj Teutës, Vllaznisë, Elbasanit apo edhe Bylisit në transfertë. Në qendër, kanë luajtur Teikseria dhe Beqja, ku vetëm portugezi e ka si rol natyral megjithatë, edhe Dita që pritet të rikthehet titullar, pozicionin e tij e ka mesfushor.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
