Bërnli i Armando Brojës vijon krizën e thellë të rezultateve në Premier Ligë. Skuadra e shqiptarit u mposht mbrëmjen e sotme 3-2 nga Fulhemi, në ndeshjen e vlefshme për raundin e 16-të. Broja u aktivizua titullar, për herë të parë në kampionat pas majit të vitit 2022, duke regjistruar dy goditje në portë, por pa arritur të gjejë rrugën e rrjetës. Kjo ishte humbja e 12-të sezonale për Bërnlin, që renditet në vendin e parafundit me vetëm 10 pikë.
Ndërkohë në Serinë A, shqetësim te Atalanta për Berat Gjimshitin. Mbrojtësi i Kombëtares shqiptare u detyrua të lërë fushën në minutën e 53-të të ndeshjes ndaj Kaljarit, për shkak të një dëmtimi muskulor në kofshën e djathtë. Gjimshiti kërkoi menjëherë zëvendësim, duke alarmuar stafin teknik të bergamaskëve.
Në një tjetër duel të kampionatit italian, Torino triumfoi minimalisht 1-0 ndaj Kremonezes, falë golit të shënuar nga Vlasiç në minutën e 27-të. Futbollistët e Kombëtares shqiptare, Ardian Ismajli dhe Kristjan Asllani, u aktivizuan titullarë dhe zhvilluan një paraqitje të plotë. Me këtë fitore, Torino rikthehet te suksesi pas gjashtë ndeshjesh pa fitore në kampionat.
