8 gola të shënuar, raste pafund për shënim, por Man.United dhe Bournemouth ndajnë nga një pikë pas barazimit spektakolar 4-4. “Djajtë e kuq” vijojnë sezonin me ulje-ngritje të forta, këtë herë ngecin në “Old Trafford”, duke shpërdoruar një tjetër rast të mirë për të dalë me pikë të plota. Tre herë kaloi ekipi i Amorim në avantazh, por në të tre rastet nuk arritën të ruanin pikët e plota.
Fillimisht ishte Diallo që kaloi United në avantazh në minutën e 13-të, por në të 40-ën Bournemouth barazoi shifrat në 1-1. Në limitet e pjesës së parë, në shtesë, Casemiro me kokë riktheu edhe një herë Man.United në avantazh.
Miqtë befasuan “djajtë e kuq” me fillimin e pjesës së dytë ku brenda pak minutash realizuan dy gola të shpejtë duke përmbysur rezultatin në 2-3. Për të rikthyer United në lojë mendoi kapiteni Bruno Fernandes, me portugezin që realizoi një super gol nga goditja e dënimit në minutën e 77-të. United nuk u mjaftua me kaq, por dy minuta më vonë Cunha përmbysi sërisht rezultatin duke rikthyer edhe një herë festën në “Old Trafford”.
United nuk ishte në gjendje të ruante këtë avantazh, pasi në minutën e 84-ët, Bournemouth i kapi sërish “mat” duke barazuar shifrat në 4-4, rezultat që këtë herë nuk ndryshoi me “djajtë e kuq” që dalin me një pikë duke u renditur në vendin e 6-të pas javës së 16-të në Premier League.
