Çështja e ditës në gjithë opinionin sportiv në vend ka qenë dhunimi i gjyqtarit Alvi Paço në stadiumin e Përmetit nga lojtarët dhe stafi i Këlcyrës. Por sikur të mos mjaftonte dhuna kafshërore brenda stadiumit, e cila u pa me zë dhe figurë, sot një grup tifozësh të Këlcyrës kishin dalë në protestë duke bllokuar rrugën. Në mënyrë absurde ata kërkonin lirimin e tre futbollistëve të arrestuar nga policia si përgjegjës për dhunën.
Protestës së tyre iu bë madje jehonë edhe nga media, kur në fakt media duhet të ishte e para që duhej të mbante një qëndrim më kritik ndaj ngjarjes. Thënë kjo, të kërkohej njëzëri përjashtimi i ekipit të Këlcyrës nga futbolli. Nuk dihet se çfarë qëndrimi do të mbajë Federata Shqiptare e Futbollit për këtë ngjarje të shëmtuar. ArgjiroLajm.net pozicionohet në anën e atyre që kërkojnë përjashtimin nga ftubolli të ekipit të Këlcyrës.
Ose së paku të përjashtohen përgjithmonë nga futbolli lojtarët përgjegjës për dhunën. Sado të indinjuar të kenë qenë ata me vendimin e arbitrit fierak, asgjë nuk e përligj dhunën në sport. ArgjiroLajm.net ka mbajtur të njëjtin qëndrim kritik edhe për atë që ndodhi rreth një muaj më parë, kur u dhunua jashtë stadiumit të Luftëtarit arbitri i ndeshjes. Dhuna në sport është e papranueshme. Huliganët që shëmtojnë lojën e bukur të futbollit meritojnë të mos jenë më as në fushën e blertë dhe as në tribuna.
©ArgjiroLajm.net
