Edicioni i tretë i Open Stage, Drejtori Teknik Pea: Një mundësi reale për të mos humbur asnjë talent shqiptar

Është mbyllur sot në Tiranë edicioni i tretë i projektit “Open Stage”, iniciativa e Federatës Shqiptare të Futbollit për evidentimin dhe përzgjedhjen e talenteve të reja, ku morën pjesë më shumë se 400 fëmijë të grup-moshave 2012, 2011, 2010 dhe 2009.

Ashtu si në edicionet e mëparshme, edhe këtë vit “Open Stage” konfirmoi progresin e vazhdueshëm të procesit të seleksionimeve, duke nxjerrë në pah lojtarë me potencial të lartë, të cilët do të ndiqen nga afër për t’u bërë pjesë e Kombëtareve të moshave.

Drejtori teknik i FSHF-së, Fulvio Pea, në një prononcim për fshf.org vlerësoi nivelin e pjesëmarrësve dhe rëndësinë që ky projekt ka për të mos lënë jashtë vëmendjes asnjë talent, veçanërisht ata që jetojnë dhe aktivizohen jashtë vendit. Sipas tij, “Open Stage” mbetet një nga instrumentet më të rëndësishme për zgjerimin e bazës së Kombëtareve dhe për ndjekjen e lojtarëve që aktivizohen në kampionate të forta europiane apo edhe në vende të tjera.

“Është mbyllur sot edicioni i tretë i Open Stage, që ka sjellë këtu në Tiranë më shumë se 400 fëmijë, të grup-moshave 2012, 2011, 2010, 2009. Si çdo vit, seleksionimet përmirësohen gjithmonë më shumë, edhe ky vit ka sjellë djem shumë interesantë, e si në të shkuarën që i kemi pasur si risi në Kombëtaret e moshave, edhe këtë vit disa djem kanë performuar shumë mirë në këtë Open Stage.

Open Stage ka lindur për të mos harruar apo humbur asnjë djalë që jeton larg Tiranës. Janë shumë shqiptarë që jetojnë jashtë vendit, ndaj e kemi marrë këtë iniciativë për t’i dhënë mundësinë të gjithëve për të provuar dhe veshur për një ditë fanellën e Kombëtares.

Këto ditë janë bërë shumë interesante për ne, sepse çdo herë ia dalim të gjejmë lojtarë që mund t’i ndjekim ose që mund të bëhen pjesë e skuadrave tona. Janë shumë që luajnë me klube profesioniste në Gjermani, Angli apo Itali që do t’i ndjekim me shumë vëmendje”, tha Pea teksa falënderoi dhe komplimentoi gjithashtu Departamentin e Skautizmit në FSHF, të gjithë skautët e angazhuar në këtë proces, zv.trajnerin e Kombëtares, Ervin Bulku, trajnerët e ekipeve kombëtare të moshave dhe të gjithë stafin e FSHF që punuan për mbarëvajtjen dhe organizimin e shkëlqyer të “Open Stage”.

© BalkanWeb