Në ditën kur Inter u rikthyer në krye të Serie A, tifozët zikaltër morën një goditje të fortë, një lajm jo pozitiv që vjen nga infermieria. Denzel Dumfries, anësori holandez, iu nënshtrua një ndërhyrje kirurgjikale në kaviljen e majtë, një vendim ekstrem që pritet t’i marrë afro 3 muaj kohë për t’u rikuperuar. Dumfries u dëmtua më 9 nëntor, në takimin kundër Lazio-s.
Në reagimin për mediat, klubi zikaltër saktësoi se ndërhyrja shkoi mirë, ndërsa duke nisur nga java e ardhshme “tulipani” holandez do të nis fazën e rehabilitimit. Pikërisht në ditën që iu nënshtrua ndërhyrjes, Dumfries njoftoi se ndryshoi agjent duke kaluar nga Jorge Mendes tek Ali Barat.
Në Itali, mediat e lexojnë këtë lëvizje të Dumfries si një divorc në horizont, është e qartë që holandezi kërkon të ndryshojë ambient. Në kushte të tilla, me Dumfries të padisponueshëm, të paktën deri në mars, Inter është i detyruar të futet në merkato për të zëvendësuar holandezin.
Sipas mediave italiane, në krye të listës së dëshirave është Brooke Norton-Cuffy, zbulimin e Genoa-s. Mbrojtësi anglez shihet nga stafi i Inter si opsioni ideal për të zëvendësuar Dumfries. Norton-Cuffy pëlqehet shumë edhe nga trajneri Chivu, me këtë të fundit që ka dhënë bekimin e tij, por për të arritur te 21-vjeçari anglez duhen të paktën 20 milionë euro.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
