I ftuar në emisionin Ndryshe”, me moderimin e Elona Duro dhe Salsano Rrapi, ka qenë artisti i njohur Yll Limani. Në një intervistë të sinqertë dhe të drejtpërdrejtë për Top Albania Radio, këngëtari ka ndarë detaje jo vetëm për projektet e tij muzikore dhe albumin më të ri, por edhe për jetën personale, marrëdhëniet dhe mënyrën se si i sheh bashkëpunimet në industrinë muzikore.
Gjatë bisedës, Yll Limani nuk u kursye në përgjigjet e tij, duke reflektuar mbi rrugëtimin artistik dhe pjekurinë që, sipas tij, vjen me kalimin e kohës. I pyetur nëse ka refuzuar ndonjëherë një bashkëpunim me kolegë të tjerë këngëtarë, ai u shpreh hapur se këndvështrimi i tij ka ndryshuar shumë ndër vite.
“Bota është shkallë-shkallë,” u shpreh Ylli, duke treguar se dikur e kishte përjetuar negativisht refuzimin nga artistë të tjerë. “Në fillim kam pasur inat me shumë këngëtarë që thoshin ‘jo’ për bashkëpunime. Por sot, me kalimin e kohës, e kupton që edhe ti vjen në situata ku duhet të thuash ‘jo’,” tha ai.
Sipas Limanit, arsyet për një refuzim nuk lidhen kurrë me arrogancën apo mungesën e respektit. Ai theksoi se ka pasur raste kur kënga nuk ka qenë e duhura, momenti jo i përshtatshëm, apo thjesht nuk e ka ndjerë si bashkëpunim të realizueshëm. “Nuk jam i pasjellshëm dhe as arrogant. Nuk më ka hipur vetja në qejf,” sqaroi këngëtari.
Artisti shtoi se, në shumicën e rasteve, është vetë ai që i fton këngëtarët për bashkëpunime, por vetëm atëherë kur ndjen se projekti ka vlerë artistike dhe se zëri i tjetrit përshtatet natyrshëm me këngën. “Kur është momenti i duhur dhe kur ka një këngë ku e ndjej zërin e dikujt tjetër, e bëj bashkëpunimin. Kur nuk më pëlqen, nuk e bëj,” përfundoi Yll Limani.
