Një ngjarje e rëndë është regjistruar sot në Orikum, ku një grua rreth 40 vjeçe, e identifikuar me inicialet S. Xh., është gjetur pa shenja jete në banesën e saj.
Sipas informacioneve paraprake, në trupin e viktimës është konstatuar një shenjë në qafë, ndërsa autor i dyshuar i ngjarjes është bashkëshorti i saj, me të cilin ajo ishte në proces divorci.
Burime nga hetimi bëjnë me dije se autori i dyshuar, i identifikuar si Llogora Xhebro, pas kryerjes së krimit, dyshohet se i ka dhënë fund jetës së tij, pak më larg banesës ku ndodhi ngjarja.
Në vendngjarje kanë mbërritur forcat e policisë dhe grupi hetimor, të cilët po punojnë për zbardhjen e plotë të rrethanave, dokumentimin ligjor të ngjarjes dhe verifikimin e të gjitha pistave hetimore.
Orikum/Informacion paraprak
Sot, rreth orës 13:30, është marrë njoftim nga urgjenca mjekësore se një shtetase, në Orikum, është gjetur pa shenja jete dhe me shenja dhune në banesë. Nga veprimet e para hetimore dyshohet se shtetasja S. Xh., 40 vjeçe, është vrarë nga bashkëshorti i saj, shtetasi Ll. Xh., 50 vjeç.
Pas kontrolleve të ushtruara nga shërbimet e Policisë në zonën përreth kësaj banese, në garazh është gjetur dyshohet i vetëvrarë me armë zjarri autori i kësaj ngjarjeje, shtetasi Ll. Xh.
Arma pistoletë e gjetur në vendngjarje u sekuestrua në cilësinë e provës materiale.
Grupi hetimor, nën drejtimin e Prokurorisë, vijon punën për dokumentimin e plotë të rrethanave të kësaj ngjarjeje.
