Kadillak ka zyrtarizuar Guaniu Zhu si pilot rezervë për sezonin 2026 në Formula 1. Piloti kinez i bashkohet skuadrës amerikane, që debuton këtë vit, përkrah Valteri Botasit dhe Serxhio Perezit, si dhe kolaudatorit Kolton Herta.
I lindur në Shangai, Zhu është piloti i parë kinez në historinë e Formulës 1 dhe sjell me vete 68 gara përvoje në kampionatin botëror. Ai debutoi në vitin 2022 me Alfa Romeon, duke grumbulluar pikë që në garën e parë në Bahrejn, ndrësa vazhdoi me ekipin edhe në vitet pasuese, përfshirë sezonin 2024 me Kik Sauber, ku siguroi të vetmin rezultat me pikë të skuadrës në Katar.
Një kontribut i rëndësishëm për Kadillakun vjen edhe nga përvoja e Zhou me Ferrarin në vitin 2025, ku shërbeu si pilot rezervë dhe testues. Para Formulës 1, ai u dallua në Formula 2 me 20 podiume dhe pesë fitore, duke u renditur i treti në kampionat në vitin 2021. “Projekt entuziazmues”, kështu e komentoi piloti kinez kalimin te skuadra Kadillak.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
