Dinamo pret me ankth, e sotmja ditë vendimtare për mbrojtësin

Dinamo arriti të fitonte ndaj Besës me rezultatin e pastër 3-0, për të siguruar biletën drejt çerekfinales së Kupës së Shqipërisë. Një gol në të parën dhe dy në të dytën, i kanë mjaftuar skuadrës së Dajës për të nisur në mënyrën më të mirë rrugëtimin drejt mbrojtjes së trofeut, të cilin e fitoi sezonin e shkuar pas shumë vitesh mungesë.

Por, fitorja ndaj Besës ishte me pasoja për Dinamon, duke qenë se blutë humbën shërbimet e mbrojtësit Bekim Maliqi i cili që në gjysmën e pjesës së parë, u detyrua të largohet me barelë për shkak të një dëmtimi të pësuar në gju. Mbrojtësi i djathtë u pa se ka pësuar një dëmtim të rëndë, pasi të qarat e tij, dëgjoheshin deri në tribuna ndërkohë që edhe futbollistët e të dyja skuadrave i janë afruar për të parë më nga afër gjendjen e lojtarit. Ditën e sotme, Maliqi do t’i nënshtrohet një rezonance magnetike, për të kuptuar shkallën e dëmtimit ndërkohë që në kampin blu, shpresojnë që të mos ketë dëmtim në ligament, pasi në këtë mënyrë, mund të konsiderohet i mbyllur sezoni aktual, pasi rikuperimi zgjat rreth 6 muaj. Një dëmtim të tillë, pësoi në verë Rustem Hoxha dhe ende nuk është kthyer në skuadër, teksa shpresohet që anësori nga Kosova, të mos ketë gjë serioze që mund ta lërë jashtë për muaj me radhë.

MERKATO- Ditët e fundit, në kampin blu është menduar për të bërë edhe ndërhyrje në merkato për shkak se krahu i djathtë çedonte. Vec Maliqit, aty është edhe Jorgo Meksi por duket se trajneri Ilir Daja nuk e ka më besimin e dikurshëm te mbrojtësi që ka luajtur për shumë skuadra në Shqipëri. Me dëmtimin e Maliqit, ndërhyrja në merkato tashmë është kthyer në detyrim për Dinamon që i duhet të gjejë një mbrojtës që mund të garantojë cilësi në krahun e djathtë, për të mos vuajtur për pjesën e mbetur të sezonit. Me qartësimin e dëmtimit të Maliqit, do të vendoset edhe për merkaton, pasi në rast se Maliqi nuk ka dëmtim të rëndë, atëherë prioritetin do ta ketë vetëm sulmi, në të kundërt, krahu i djathtë do të ishte një tjetër repart ku me patjetër duhet ndërhyrje në muajin janar.

© BalkanWeb