Formula 1 drejt sezonit të ri, Red Bulli dhe Versttapen hapin të parët kartat

Ka kaluar vetëm një muaj që nga momenti kur ndryshimi i madh mbërriti në Formula 1. Lando Norris e çoi MekLarenin e tij në vijën e finishit në Yas Marina si i treti në Çmimin e Madh të fundit të vitit 2025, duke u shpallur kampion bote dhe duke i dhënë fund dominimit të Maks Vershtapenit.

Me katër tituj botërorë dhe një rikthim heroik që ishte shumë pranë suksesit, Vershtapen luftoi deri në fund. Norris sundoi, por shampanja mezi është tharë…, ndërsa Formula 1 tashmë i ka sytë nga viti 2026. Çuditërisht, edhe këtë herë gjithçka nis sërish nga holandezi dhe skuadra e tij. Ata janë të parët. Red Bull dhe ekipi i tij satelit, Racing Bulls, do të jenë të parët që do të zbulojnë konceptin për sezonin 2026. Është e vërtetë që Audi ishte e para që doli në pistë në Barcelonë, por nga ajo njëvendëshe teorikisht e ndryshme nga ajo që do të garojë realisht në sezon, nuk mund të nxirren përfundime të qarta.

Vëmendja do të përqendrohet te skuadra me bazë në Milton Keynes, edhe pse gjatë parasezonit dhe deri në garën hapëse në Australi gjithmonë ka ndryshime. Sidomos duke pasur parasysh se ata tashmë kanë konfirmuar se makina do të prezantohet me dekorimin zyrtar. Fillimisht, makinat do të marrin formë në Panairin Ndërkombëtar të Automobilëve të Amerikës së Veriut, i njohur gjerësisht si Panairi i Detroitit. Ford, markë e lidhur ngushtë me ADN-në e zonës, ka një rol kyç dhe partneriteti i saj me Red Bullin e çon pikërisht aty këtë prezantim.

FORD DHE RED BULL

Për Red Bullin, makina e re përfaqëson një sfidë totale. Ata e shfrytëzuan në maksimum rregulloren e vitit 2025, në sezonin e fundit të saj, dhe Maks Vershtapen ishte pranë shndërrimit të kësaj përpjekjeje në një titull botëror të papritur. Në vitin 2026, gjithçka do të nisë nga zero në fabrikën e tyre, me Fordin si aleatin kryesor, veçanërisht në pjesën më të rëndësishme të paketës së re rregullatore: motorin. Objektivi është i qartë, të jenë konkurrues që në fillim dhe t’i japin Vershtapenit, figurës qendrore të projektit, një makinë të aftë që nga dita e parë e sezonit 2026. “Besojmë se jemi në një pozicion të mirë falë gjithë punës së bërë në fabrikë, por do ta dimë me siguri vetëm kur ta shohim makinën në pistë”, deklaroi Mark Rushbrook, drejtori i garave i Fordit.

“Ky nuk është vetëm një hap drejt së ardhmes, por një shprehje e asaj që ndodh kur bashkohen inxhinieria e nivelit botëror, inovacioni dhe pasioni. Jemi jashtëzakonisht të emocionuar për të nisur këtë kapitull të ri, të udhëhequr nga përsosmëria dhe vendosmëria që përcaktojnë Fordin dhe Red Bullin”, u shpreh Laurent Mekies, drejtuesi kryesor i ekipit. Eventi i prezantimit është planifikuar për orët e para të mëngjesit të 16 janarit, në orën 04:00. Për shkak të orarit amerikan, eventi do të transmetohet në kanalin zyrtar të Red Bull.

© BalkanWeb