Pasi arkivoi ndeshjen dhe fitoren në Kupë me rezultatin 3-0 përballë Burrelit, te Partizani tashmë kanë nisur të mendojnë për kampionatin aty ku të enjten në orën 13:30 të kuqtë do t’i japin jetë fazës së tretë së Superiores.
Përballë do të jetë Vora, sfidë e cila do të rikthejë skuadrën vorake në shtëpinë e tyre, një element që në entuziasmin e vendasve mund ta komplikojë edhe më tepër 90- minutëshin për 17-herë kampionët e Shqipërisë. Në kampin e të kuqve kanë nisur përgatitjet teksa pas mungesave në ndeshjen e Kupës, skuadrës dhe trajnerit Oltijon Kërnaja i rikthehet në dispozicion dyshja Andi Janjeva dhe Rrok Toma.
Si mbrojtësi, ashtu dhe sulmuesi kishin shqetësime të vogla dhe tekniku Kërnaja duke qenë se ndaj Burrelit luhej edhe në tapet artificial vendosi të mos i rrezikojë për t’i pasur në gatishmëri të plotë për ndeshjen e kampionatit. Tashmë, Janjeva dhe Toma janë të gatshëm për të marrë minuta dhe për të kontribuar për ekipin duke nisur nga kjo javë. Ashtu siç edhe dihet, Partizani kërkon të shmangë çdo hap fals të mundshëm në kampionat duke qenë se kryeqytetasit janë disi larg vendit të katërt që aktualisht është në pronësinë e Vllaznisë, teksa shkodranët kanë një epërsi prej shtatë pikësh.
Megjithatë, në kampin e Partizanit ende nuk e kanë thënë fjalën e fundit dhe do të provojnë deri në finishin e kampionatit për të mbërritur zonën e “Final Four” që iu jep mundësinë të garojnë për trofeun e Superiores, por edhe për një nga vendet që garanton pjesëmarrjen në Kupat e Europës për sezonin e ardhshëm. Një rezultat pozitiv do t’i jepte Partizanit edhe më shumë moral e motivim për vazhdimësinë në kampionat dhe do të shtonte presionin ndaj skuadrave kundërshtare.
Në ndeshjet e mëparshme të këtij kampionati mes Partizanit dhe Vorës, bilanci flet për të kuqtë e kryeqytetit të cilët kanë marrë katër pikë, duke fituar në ndeshjen e parë falë një autogoli të Rrepajt me rezultatin 1-0, ndërsa takimi i dytë është mbyllur në barazim me rezultatin e bardhë 0-0.
