Futbollisti shqiptar Mirlind Daku po kalon një periudhë të vështirë personale, pasi ka humbur një anëtar shumë të dashur të familjes. Ai ka njoftuar ndarjen nga jeta të xhaxhait të tij përmes një postimi emocional në rrjetet sociale, duke prekur ndjekësit dhe opinionin sportiv.
Në reagimin e tij, Daku ka shprehur dhimbjen e madhe për humbjen e njeriut që kishte një rol të veçantë në jetën e tij. Xhaxhai i ndjerë nuk ishte vetëm një familjar i afërt, por edhe figura që i kishte dhënë emrin dhe kishte ndikuar drejtpërdrejt në formimin e identitetit të tij personal. Sipas futbollistit, lidhja mes tyre ka qenë e fortë dhe e mbushur me dashuri, respekt dhe krenari të ndërsjellë.
“Pushofsh në paqe, xhaxha i dashur. Ti nuk ishe vetëm xhaxhai im, ishe njeriu që ma fali emrin dhe një pjesë të identitetit tim. Që nga sot, emri që mbaj do të jetë gjithmonë kujtim i gjallë i dashurisë, krenarisë dhe respektit që kishe për mua. Do të jetosh përherë në zemrën time dhe në çdo hap që do të bëj. Zoti të mëshiroftë dhe të shpërbleftë me Xhenet”, shkroi futbollisti.
Mesazhi i futbollistit është shoqëruar me lutje dhe fjalë ngushëllimi, duke i uruar prehje në paqe të ndjerit dhe mëshirë hyjnore.
