Në Portugali u zhvillua IBJJF European Championship 2026, kampionati europian më prestigjioz i Brazilian Jiu Jitsu, një disiplinë që po njeh një përhapje të shpejtë dhe rritje të vazhdueshme në të gjithë Europën. Shqipëria u përfaqësua nga Tirana MMA Center, nën drejtimin e trajnerit Rezart Spahia.
Prej vitesh, Tirana MMA Center është i vetmi ekip shqiptar që merr pjesë rregullisht në këto kompeticione elitare, duke u përballur me sportistët më të fortë të kontinentit dhe duke ndërtuar një prani serioze ndërkombëtare për Shqipërinë në këtë disiplinë.
Në këtë edicion të kampionatit, ekipi shqiptar u paraqit me pesë sportistë, përfshirë edhe një përfaqësuese në kategorinë e femrave, dhe arriti të sjellë një tjetër medalje ari për Shqipërinë. Dardan Spahia u shpall kampion europian në kategorinë e tij, duke konfirmuar punën e qëndrueshme dhe investimin afatgjatë të akademisë në sportistët e rinj.
Përtej medaljes, paraqitja e sportistëve të tjerë ishte domethënëse dhe konkurruese në një turne ku niveli është ekstremisht i lartë. Ferhat Gjika e nisi garën me siguri dhe vendosmëri, duke kaluar me sukses ndeshjen e parë dhe duke treguar se është i aftë të garojë në këtë nivel. Edon Shehu zhvilloi një paraqitje pozitive që në fillim të turneut, duke konfirmuar përgatitjen e tij, ndërsa u ndal në fazën pasuese përballë konkurrencës së fortë.
Edhe Dennis Sejdia u shfaq i qetë dhe i kontrolluar në ndeshjen e parë, duke arritur një fitore bindëse, ndërsa në ndeshjen e dytë u përball me vështirësitë që karakterizojnë turnetë e elitës europiane. Në kategorinë e femrave, Albjona Agolli garoi në një grup shumë të fortë, duke zhvilluar një ndeshje të ekuilibruar dhe të luftuar deri në fund, e cila u vendos vetëm nga vendimi i arbitrave.
Ekipi shqiptar u drejtua në Portugali nga trajneri Rezart Spahia, ndërsa përgatitjet u zhvilluan me mbështetjen edhe të trajnerit Olsi Zaimi. Pjesëmarrja në IBJJF European Championship nuk është për Tirana MMA Center një formalitet, por pjesë e një filozofie të qartë sportive: përballje me nivelin më të lartë, mësim nga çdo garë dhe ndërtim i një ekipi gjithnjë e më të fortë.
Në një disiplinë që po fiton gjithnjë e më shumë terren në Europë, Tirana MMA Center vazhdon të përfaqësojë Shqipërinë me seriozitet, ambicie dhe qëndrueshmëri.
“We learn. We adapt. We come back stronger!” Shkruhet ne postimin e Tirana MMA ne rrjetet sociale
