Nga Serie A, kolonia kuqezi prej kohësh është shpërngulur në Turqi, ku të fundit që iu bashkuan këtij trendi ishin Asllani dhe Rey Manaj, në fakt për “bomberin” kuqezi ishte një rikthim në shtëpi, te Sivasspor. Manaj justifikoi menjëherë investimin e bërë, me sulmuesin kuqezi që realizoi një “dopietë” golash në fundjavë, njëri prej tyre ishte një kryevepër e vërtetë duke tundur rrjetën nga goditja e dënimit.
Spektakël këtë fundjave dhuroi edhe Eresnt Muçi, me sulmuesin shqiptar që vijon formën e tij fantastike. Muçi ishte spektakolar në derbin e Stambollit duke realizuar një gol shumë të bukur ndaj Fenerbahce-s. Ky ishte goli i tij i 13-të sezonal me fanellën e Trabzonspor. Për herë të parë në karrierë, Muçi prek këtë shifër, një rekord personal.
Spektakolar këtë fundjavë ishte edhe Thomas Strakosha, me gardianin kuqezi që bëri heroin për ekipin e tij AEK Athina përballë PAOK. Strakosha priti një 11-metërsh në minutën e 12-të duke mbajtur në lojë ekipin e tij që doli me një pikë nga ky takim pas barazimit pa gola. Falë Strakoshës, AEK ruan kreun në Superligën greke.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
