Berat Gjimshiti mbetet një nga mbrojtësit më të vlerësuar në Serie A. Prej vitesh, kapiteni kuqezi ka udhëhequr prapavijën e Atalantës, e bëri diçka të tillë me Gasperinin, por mbetet pikë fikse edhe me trajnerin e ri, Palladino. Emri i Gjimshitit po lakohet fuqishëm këtë periudhë në Itali, kjo edhe për një tjetër arsye të fortë, Gjimshiti është futur në vitin që i përfundon kontrata, në fund të këtij sezoni mund të largohet falas. Sigurisht që Atalanta nuk ka ndërmend të dorëzohet kaq lehtë, përfaqësues të klubit bergamask po përpiqen këtë periudhë të bindin Gjimshitin të rinovojë kontratën.
Pengesë në këtë pikë, është fakti që për kapitenin shqiptar interesohen disa klube të mëdha në Serie A, me në krye Juventus. “Zonja e Vjetër” e ndjek prej kohësh Gjimshitin, por tani është mundësia më e mirë për të marrë në Torino pasi bëhet fjalë për një lojtar me shumë eksperiencë dhe për më tepër me kosto zero.
Jo vetëm Juventus, në garë për Gjimshitin janë edhe dy ekipet të tjera në Serie A, Milan dhe Roma. “Djalli” kërkon të përdor kartën Igli Tare, me Drejtorin Sportiv të Milan që do të përpiqet të bind shqiptarin të transferohet në Milano.
Sigurisht nuk përjashtohet as Roma në këto negociata pasi nuk është një sekret që Gjimshiti ka një marrëdhënie të shkëlqyer me Gasperinin, ish trajnerin dhe mentorin e tij.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
