Sezoni i ri histori e vjetër, Myrto Uzuni e nis aty ku e mbylli në MLS, bën “bomberin” për ekipin e tij Austin, duke shënuar golin e parë në sfidën hapëse të këtij sezoni në Amerikë. Me një nuhatje të vërtetë, Uzuni ndoqi mirë një aksion sulmues dhe i pa shqetësuar shumë pranë vijës fatale shtyu topin me gjok duke realizuar gol për Ausitin. Për fat të keq goli i sulmuesit shqiptar nuk mjaftoi, me ekipin e tij që doli me një pikë pas barazimit 2-2 kundër Minnesota-s.
Nuk mungoi protagonizmi i legjionarëve kuqezi edhe në Turqi. Ernest Muçi vijon formën e tij fantastike, këtë herë duke dhuruar një asist shumë të bukur. Sulmuesi kuqezi udhëhoqi ekipin e tij në suksesin 2-1 përballë Gaziantep. Ky ishte asisti i tij i 6-të këtë sezon, plus 13 gola.
Titullar dhe protagonist absolut për ekipin e tij ishte edhe Kristjan Asllani. Mesfushori kuqezi dhuroi një asist të bukur në golin e dytë të Beshiktash. “Shqiponjat” triumfuan pastër 4-0 përballë Goztepe, me Asllanin që qëndroi në fushë deri në minutën e 81-të duke udhëhequr mesfushën e bardhezinjve.
Forma shumë e mirë e tre legjionarëve kuqezi është pa diskutim një lajm shumë i mirë për trajnerin Sylvinho këtë periudhë, me këtë të fundit që prej kohësh ka nisur të bëjë llogaritë për takimin e parë në fazën “play-off”, atë kundër Polonisë.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
