Në 3 vitet e fundit, tifozët zikaltër përjetuan një super sezon në Champions, shkuan 2 herë deri në finale, por tani e shohin vetën jashtë që në fazën “play-off”. Me sa duket fusha nuk ishte problemi kryesor i Inter, me Bodo/Glimt që triumfoi edhe brenda në “San Siro” duke i shënuar 5 gola në total ekipit të Chivu, shifra që nuk lënë vend për koment, me norvegjezët që kalojnë me meritë duke i dhuruar një leksion të pastër futbolli ekipit që ka prekur me njërën dorë titullin në Serie A. Pa diskutim që ky eliminim i rëndë nuk i lë një shije të mirë trajnerit Cristian Chivu:
“E provuam në çdo formë, por përballë kishim një skuadër të organizuar mirë. Faktin që ne nuk arritëm të zhbllokonim ndeshjen i krijoi një komoditet për të bërë disa gjëra. Nuk kam çfarë t’i kërkojë djemve, ata dhanë të gjithë energjitë që kishin. Sigurisht që na vjen keq, na la një shije të hidhur ky eliminim, pasi tentuam në çdo formë për të kaluar turin. Më duhet t’i bëjë komplimente edhe rivalëve tanë, ata e merituan të kalonim më tej”, u shpreh ndër të tjera Chivu.
Ky eliminim nga një rival si Bodo/Glimt, absolutisht i kalueshëm në letër, zbeh jo pak kuotat e Cristian Chivu. Pak përpara ndeshjes së kthimit në “San Siro”, në lidhje me të ardhmen e teknikut rumun foli edhe presidenti Giuseppe Marotta. Numri 1 i klubit zikaltër u pyet për lajmet që vinin nga Spanja, ku mediat shkruanin se Inter dhe Diego Pablo Simeone kanë një parakontratë për sezonin e ri:
“Absolutisht është një fake news. Nuk ja vlen as të flas për këtë, ne jemi jashtëzakonisht të kënaqur me Chivu, ai po e vërteton se është në lartësinë e duhur për të drejtuar Inter”, u shpreh Marotta.
