Pas Inter, edhe Juve del nga Champions, me “Zonjën e Vjetër” që dha gjithçka në “Stadium”, por Zhegrova dhe fati nuk ishin me ekipin e Spallettit që del me kokën lart. Në fund feston Gallatasary, me turqit që vënë në jetë një kryevepër të vërtetë. Pas suksesit 5-2 në Stamboll, Gallata përjetoi makthe në Torino, në një kohë kur koha e rregullt përfundoi 3-0 në favor të Juves, ndërsa në shtesë Osimhen dhe Yilmaz realizuan dy gola duke nxjerr “Zonjën” nga Champions.
Në “Stadium” u zhvillua një betejë e vërtetë për çdo top, ndërsa në minutën e 37-të Thuram fitoi një 11-metërsh. Nga pika e bardhë, Locatelli u tregua i saktë duke zhbllokuar ndeshjen. Gjerat nisën keq në fraksionin e dytë ku në minutën e 48-të Kelly u ndëshkua me karton të kuq duke lënë Juven me 10-të lojtarë. Në minutën e 67-të, Spalletti hodhi në fushë edhe Zhgrovën, ndërsa tre minuta më vonë, Gatti në shtyllën e dytë e kishte të lehtë të shtynte topin në rrjetë duke realizuar golin e dytë, një gol që ndezi stadiumin dhe shpresën për të synuar kualifikimin. Juve gjeti forcën dhe guximin duke e bërë edhe më spektakolare këtë takim ku në minutën e 82-të, McKennie me kokë realizoi golin e tretë duke bërë që ndeshja të përfundonte në shtesë.
Zhegrova kishte shansin të shënonte një gol me shumë peshë, por i pa shqetësuar brenda në zonë gjuajti keq duke shpërdoruar një rast të artë. Gallatasary fitoi zemër dhe në momentin më të përcaktues të ndeshjes, Osimhen i ndëshkoi me një goditje të saktë brenda në zonë. Çuditërisht “bomberi” nigerian nuk festoi, ku pas ndeshjes zbuloi se nuk festoi në shenjë respekti ndaj Spallettit. Për të mbyllur përfundimisht llogaritë me Juventus mendoi Yilmaz, me këtë të fundit që realizoi golin e dytë për turqit duke i dhuruar Gallatës një biletë për në fazën e 1/8 në Champions.
Pavarësisht se Juve doli nga Champions që në fazën play-off, në Itali, mediat nuk e bënë dramë: “Juve për t’u duartrokitur”, shkruan La Gazzetta dello Sport. “Faleminderit heronj”, ishte titulli kryesor i TuttoSport.
