Çmimi i Madh i Australisë është pranë dhe do të shënojë një rinisje historike për Formulën 1.
Koha e diskutimeve, dyshimeve dhe pyetjeve do t’i lërë vendin aksionit të vërtetë në pistë, aty ku do të vendoset suksesi i epokës së re të kategorisë mbretërore të automobilizmit. Sfida është e madhe: të bindë pas një dimri ku disa pilotë kanë shprehur rezerva pas testimit të njëvendësheve të reja, të cilat janë më të vogla dhe më të lehta. Por kërkojnë një kompromis të vazhdueshëm mes menaxhimit të energjisë, rikuperimit dhe performancës, duke krijuar një panoramë krejt ndryshe nga ajo e mëparshmja.
ZËRAT E YJEVE, KRYESISHT KRITIKË – “Duhet diplomë universitare për t’i kuptuar makinat e reja”, deklaroi Luis Hamilton, i pari që ngriti zërin. Edhe më i drejtpërdrejtë ishte Maks Vershtapen: “Janë si Formula E me steroide”. Sipas tij, ndjesitë nuk janë ato që kërkon, duke shtuar dyshimet mbi një F1 që disa e kanë quajtur dështim pa u fikur ende semafori i parë.
JO GJITHÇK A ËSHTË BARDH E ZI – Megjithatë, kjo nuk është një çështje bardh e zi. Ka shumë nuanca gri. Askush nuk ka harruar se fillimi i epokës hibride u perceptua si një kthesë negative në historinë e sportit. Por ajo përfundoi duke dhuruar një nga sezonet më dramatike në histori, në vitin 2021, me duelin mes Hamiltonit dhe Vershtapenit. Për momentin, disa zëra kërkojnë qetësi, si Fernando Alonso dhe Karlos Sainz. Piloti asturian i Aston Martin theksoi se pilotët janë aty për të garuar, qoftë edhe me makina kart me qira apo me karroca supermarketesh. “Janë thjesht gara. Nis me dritën jeshile dhe përfundon me flamurin me kuadrate. Gjithçka tjetër është pjesë e garës dhe mësohesh shpejt. Fillimisht do të doje të drejtoje gjithmonë në limit me një makinë ndryshe, por F1 ka marrë një drejtim tjetër dhe duhet të përshtatesh me një menaxhim tjetër të motorit”, u shpreh Alonso gjatë prezantimit të skuadrës. “Do të mësohemi”, shtoi më tej dy herë kampioni i botës. Ndërkohë, Sainz është gjithmonë i kujdesshëm ndaj rregulloreve dhe i aftë të analizojë çdo detaj teknik, kërkoi durim. “Nuk dua të pozicionohem. Të kritikosh publikisht sportin tonë nuk na sjell dobi. Dua të pres tre, katër apo pesë gara për ta vlerësuar”, tha ai. Megjithatë, dha edhe një paralajmërim: “FIA duhet të ketë mendje të hapur për të ndryshuar gjëra që përmirësojnë spektaklin.”
FAKTE MË SHUMË SE FJALË – Opinionet janë të ndara, por treguesi më i sigurt mbetet pista. Deri tani, më i shpejti ka qenë Sharl Lëklerk me kohën 1:31.992, pak më shumë se dy sekonda më ngadalë se 1:29.841, koha e “pole position” e Oskar Piastrit me makinat e vitit 2025. Ajo ishte një gjeneratë në vitin e saj të fundit, e rafinuar në maksimum. Pra, diferenca nuk është aq dramatike sa mund të mendohej. Simulimet e para krahasuese tashmë ekzistojnë. Një prej tyre, nga “Just Formula Car”, tregon diferencat mes rekordit të para-sezonit 2025 të Sainzit dhe kohës së Lëklerkut. Makina e vitit 2026 është jashtëzakonisht e shpejtë në vijë të drejtë (edhe pse jo me 400 km/h siç sugjeronte me entuziazëm Toto Volf), por humbet terren në kthesa. Që nga kthesa e parë, makinat me efekt tokësor ruajnë epërsinë, duke thelluar diferencën në sektorin final me kthesa më të gjera dhe më pak teknike. Në thelb, janë dy botë të ndryshme dhe në Formula 1 2026, puna sapo ka filluar.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
