Mbrëmja e djeshme shënoi fundin e aventurës së Big Brother VIP Kosova 4, një finale që u ndoq me shumë interes nga publiku. Pas javësh të mbushura me debate, emocione dhe momente të forta, fitues i këtij edicioni u shpall Londrimi, i cili arriti të fitojë simpatinë e publikut me qëndrimin dhe karakterin e tij gjatë lojës. Pas shpalljes së rezultatit, finalistët dhe disa nga ish-banorët ndaluan për intervista, duke komentuar rrugëtimin në shtëpinë më të famshme në Kosovë dhe reagimet që kanë marrë nga publiku.
Ndër ta ishte edhe Dolce, e cila foli hapur për komentet dhe kritikat që ka marrë pas eksperiencës në reality show.
“Reagime ka pasur shumë, edhe kritika normalisht. E di shumë mirë ku jetojmë dhe i kam pritur. Nuk më mërzisin, sepse kam marrë shumë dashuri dhe njerëzit që më mbështesin janë shumë më tepër se ata që mund të ofendojnë,” u shpreh ajo.
Dolce theksoi se nuk i kushton rëndësi komenteve negative dhe se preferon të qëndrojë larg njerëzve që përfshihen në diskutime apo thashetheme. Deklarata e saj tregon se, pavarësisht polemikave që shpesh shoqërojnë banorët pas daljes nga shtëpia, disa prej tyre zgjedhin të fokusohen te mbështetja dhe energjia pozitive që marrin nga publiku.
