Në një muaj të vështirë për Juven, me vetëm 2 fitore në 8 ndeshje dhe pasi u eliminuan nga Champions, më në fund vjen një lajm pozitiv për tifozët e “Zonjës së Vjetër”, por jashtë fushe. Weston McKennie, një nga lojtarët më efikas me Spallettin në stol, rinovoi kontratën e tij deri në 2030. Me kontratën e re, amerikani përfiton edhe një rritje të ndjeshme të pagës, nga 2,5 mln euro në 4 milionë euro në sezon.
McKennie po kalonte një moment shumë të mirë, autor i 8 golave dhe 7 asisteve këtë sezon. Amerikani konsiderohet si një nga elementet më të rëndësishëm të Spallettit dhe kjo lëvizje tregon qartë se drejtuesit e “Zonjës së Vjetër” synojnë të zgjasin bashkëpunimin edhe me teknikun italian. Në reagimin e tij të parë për faqen zyrtare të klubit, McKennie nuk e fshehu gëzimin për këtë kontratë të re: “Përshëndetje tifozë juventin. Jam shumë i lumtur që rinovova kontratën time. Jam i lumtur që do të qëndroj me ju. Shihemi në fushë”, u shpreh ndër të tjera sulmuesi amerikan.
Pas McKennie, drejtuesit e Juves shpresojnë të bëjnë të njëjtën gjë edhe me Dusan Vlahovic. Nga Italia mediat bëjnë me dije se tani rinovimi i kontratës me sulmuesin serb nuk është më i pamundur. Palët janë afruar shumë gjatë periudhës që Vlahovic ishte i dëmtuar, kanë rivendosur kontaktet për të gjetur një akord të shpejtë në një kohë kur serbi është futur në vitin që i përfundon kontrata, qershor 2026.
Gjithnjë sipas mediave, Chiellini do të takohet me përfaqësuesin e Vlahovic javën e ardhshme për të gjetur një akord të kënaqshëm për të gjithë. Përcaktues në këto negociata është edhe roli i Spallettit, me teknikun “azzurr” që ka dhënë pëlqimin e tij për të pasur Vlahovic në Torino edhe sezonin e ri.
