Për herë të fundit, kur Milan fitonte dy derbe brenda një sezoni, “djalli” fitonte edhe titullin në Serie A, por këtë herë Allegri nuk beson në të njëjtin përfundim, për të 7 pikë janë një diferencë e madhe:
“Tani Inter është 7 pikë përpara. Kemi arritur në kuotën e 60 pikëve, po mbajmë larg Como e Juve. Kemi 6 muaj që punojmë për të arritur në mars në kushtet më të mira të mundshme, tani vendoset sezoni. Thënë këtë, Inter është dukshëm ekipi favorit për të fituar titullin. Ne kemi kaluar disa muaj me 13-14 lojtarë në dispozicion. Djemtë kanë bërë sforco të rëndësishme, por tani të gjithë janë mirë. Jemi mirë fizikisht dhe kjo fitore na jep më shumë besim dhe moral për pjesën e mbetur të sezonit”, u shpreh Allegri.
Sigurisht, nuk e priti mirë këtë humbje trajneri Chivu, në sytë e tij ekipi bëri shumë gabime, mbi të gjitha në pjesën e parë:
“Ishte një ndeshje nën ton, pa dinamika. Ata na pritën poshtë për të na goditur me kundërsulme. Mund të bënim më mirë, por loja jonë kalon nga sulmuesit, ata na mungon sot. Prekja me dorë e Ricci? Më thanë që u pa edhe në VAR, kështu që nuk kam se çfarë të them. Unë mendoj vetëm për lojën tonë, për gabimet që bëmë”, u shpreh Chivu.
