Egli Tako duket se vazhdon të jetë në qendër të vëmendjes së publikut dhe mediave rozë. Edhe pse ajo ka mohuar disa herë zërat për një lidhje të re pas ndarjes së bujshme nga këngëtari Gjesti, rrjeti duket se nuk pushon së analizuar çdo detaj nga jeta e saj.
Së fundmi, në rrjetet sociale kanë nisur të qarkullojnë aludime për një romancë të mundshme mes saj dhe ish-banorit të “Big Brother VIP Albania”, Redon Beranit. Dyshimet e fansave janë ngritur pas disa postimeve që, sipas tyre, përmbajnë “shenja” të përbashkëta.
Vëmendjen e ndjekësve e ka tërhequr veçanërisht një makinë luksoze. Redon Berani ka publikuar një foto ku shfaqet pranë një fuoristrade të zezë Mercedes G-Class, ndërsa në postime të tjera në Instagram, Egli Tako është parë gjithashtu pranë një automjeti të ngjashëm.
Madje, një nga fotot e Eglit, ku ajo shfaqet e ulur brenda një makine, është interpretuar nga fansat si një tjetër “provë” që mund të lidhë dy ish-banorët e BBVA.
Megjithatë, deri tani asnjëri prej tyre nuk ka reaguar ndaj këtyre spekulimeve dhe gjithçka mbetet vetëm në nivel dyshimesh nga ndjekësit në rrjet.
Kujtojmë se Egli Tako dhe Redon Berani krijuan një raport shumë të afërt dhe miqësor në ditët e para të qëndrimit në shtëpinë e “Big Brother VIP Albania”. Megjithatë, rrugëtimi i tyre u ndërpre pasi Redoni vendosi të largohej nga formati për shkak të presionit të përjetuar. Vetëm pas daljes së tij nga shtëpia, Egli nisi romancën e saj me Gjestin.
