Para se të bëhej yll i Super Bowl dhe të shënonte touchdown-e në fushën e NFL-së, Travis Kelce e kalonte kohën duke u ngjitur në roller coaster-at e Cedar Point në Ohio. Tani, ylli i Kansas City Chiefs do të ketë një rol të ri në industrinë e argëtimit, duke u bërë ambasador i markës për kompaninë më të madhe rajonale të parqeve të argëtimit në Amerikën e Veriut, Six Flags.
Sipas njoftimit të kompanisë të enjten, 12 mars, Kelce do të shërbejë si ambasador i markës gjatë gjithë vitit 2026, duke përfshirë promovime në rrjete sociale, media transmetimi, platforma streaming dhe material marketingu brenda parqeve.
“Parket Six Flags ishin pjesë e fëmijërisë sime dhe vendi i disa prej kujtimeve më të bukura. Jam i entuziazmuar të bashkëpunoj me kompaninë ndërsa ajo nis një kapitull të ri,” tha Kelce në një deklaratë për shtyp. Ai shtoi se dëshiron të ndihmojë në krijimin e eksitimit për parqet dhe të prezantojë një gjeneratë të re fansash me përvoja të paharrueshme.
Presidenti dhe CEO i Six Flags, John Reilly, tha se Kelce është “një fans i lindur i Six Flags” dhe se personaliteti i tij argëtues dhe përkushtimi ndaj ekselencës do të kontribuojnë po aq fuqishëm edhe në parqet e argëtimit.
Ky njoftim vjen pas një periudhe tranzicioni për kompaninë, e cila njoftoi shitjen e shtatë pronave të saj në Amerikën e Veriut për t’u fokusuar tek parqet më të suksesshme, përfshirë Michigan’s Adventure, Schlitterbahn Waterpark Galveston dhe Six Flags Great Escape. Të gjitha këto parqe do të vazhdojnë operimin normal gjatë sezonit 2026, ndërsa pronat do t’u kalojnë kompanive të tjera për menaxhim.
