Në Gjykatën Themelore në Prishtinë, është duke u mbajtur seanca dëgjimore ndaj këngëtarit Besart Kelmendi i njohur në publik me emrin “Gjesti”, por që aty nuk u lejua të jetë babai i tij. Ai u arrestua me 11 mars, e kur Prokuroria Themelore në Prishtinë, Departamenti i Përgjithshëm, njoftoi se ai dyshohet për kryerjen e veprave penale:
“Mbajtja në pronësi, kontroll ose posedim të paautorizuar të armëve”, “Kanosja” si dhe veprën penale “Asgjësim apo dëmtimi i pasurisë”.
E gjithë ngjarja dyshohet të ketë ndodhur pranë zyrave të studios muzikore Onima në Prishtinë. Dyshohet se shkak i incidentit ka qenë një mosmarrëveshje rreth një borxhi paraprak. Sipas këtyre pretendimeve, këngëtari dyshohet se ka shkuar me armë në dorë në zyrat e studios duke kërkuar një person me inicialet E.Sh. Burimet thonë se ai iu është drejtuar stafit me fjalët: “Ku o se kam me vra”.
Meqenëse nuk e kishte gjetur personin që po kërkonte, dyshohet se në shenjë revolte për mosmarrëveshjen rreth pagesave të borxhit, këngëtari ka dëmtuar inventarin e studios, duke thyer kompjuterë, tavolina dhe xhama, çka ka shkaktuar edhe dëm material.
Po sipas këtyre burimeve, kur në vendin e ngjarjes kanë arritur zyrtarët e Policia e Kosovës, këngëtari është gjetur me armë në dorë, e cila më pas është sekuestruar nga policia.
