Ferrari mund të zvogëlojë diferencën ndaj Mercedesit tashmë falë të famshmes krahu “Macarena”. Risia teknike e inxhinierëve të Maranelos, e parë për herë të parë gjatë testeve në Bahrein, ka mbërritur në Kinë dhe pritet të debutojë zyrtarisht gjatë fundjavës së garës në Shangai.
Është një garë kundër kohës, të cilën Luis Hamilton e ka vlerësuar: “Nuk ishte planifikuar ta kishim që tani këtu. Falënderoj ekipin për përpjekjet e bëra. E testuam për një ditë dhe mendoj se funksionon mirë”.
Fillimisht përdorimi i saj ishte parashikuar për Çmimin e Madh të Bahrejnit, i cili tani është në rrezik për shkak të konfliktit në vazhdim mes SHBA-së dhe Izraelit kundër Iranit. “Macarena” është një armë shtesë për pilotin britanik dhe për Sharl Lëklerkun. Por çfarë është krahu “Macarena”?
Bëhet fjalë për një krah të pasëm me flap plotësisht të rrotullueshëm. Ai mund të rrotullohet deri në 270°, në vend të 90°-ve klasike, gjë që pritet të sjellë një avantazh në shpejtësi të vlerësuar mes 5 dhe 8 km/h, si dhe një menaxhim më efikas të baterisë. Mekanikët, pasi e morën krahun nga Maranelo, e kanë montuar tashmë në dy makinat SF-26. Me shumë gjasë do ta shohim gjatë sesionit të provave të lira, dhe më pas skuadra do të vendosë nëse do ta përdorë gjatë gjithë fundjavës së garës.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
