Për fat të keq, heroi i Serbisë, sulmuesi i preferuar i Sylvinho-s, Rey Manaj humbet sfidat e fazës “play-off”. “Bomberi” kuqezi bëri gjithçka për të qenë në kushte perfekte për këtë takim me historinë, madje hoqi dorë nga milionat e sheikëve për t’u rikthyer edhe një herë në Turqi, tek ish ekipi i Sivasspor, me shpresën që rikthej në formën e tij optimale, por fati nuk ishte me të teksa në sfidën e fundit në kampionat pësoi një dëmtim të rëndë.
Manaj doli nga fusha pas vetëm 7 minutash, ndërsa rezonanca magnetike nxori në pah një dëmtim në muskulin e kofshës së majtë. Në raportin mjekësorë, klubi i Sivasspor bën me dije se bëhet fjalë për: një çarje të tendinës brenda muskulit të kofshës së majtë, një dëmtim i shkallës së tretë dhe gjakderdhje, çka e bën të pamundur jo vetëm rikuperimin e tij në kohë për sfidat e fazës “play-off”, por me shumë mundësi Manaj humbet edhe pjesën e mbetur të sezonit.
Pa diskutim, dëmtimi i Rey Manaj trondit në themel planin e Sylvinho-s për ndeshjet e fazës “play-off”, pasi në sytë e tij, Manaj ishte projektuar si titullarë për takimin kundër Polonisë. Në kushte të tilla, Sylvinho është i detyruar jo vetëm të ribëj formacionin, por edhe të ndryshojë listën e lojtarëve.
