Pas një fundjave pushimi, Vllaznia është rikthyer këtë të hënë në fushën stërvitore, duke nisur përgatitjet për sfidën e radhës në kampionat.
Trajneri Edi Martini u kishte dhënë lojtarëve dy ditë kohë për t’u çlodhur dhe për të rikuperuar energjitë, pas një periudhe të ngjeshur me ndeshje që ka kërkuar shumë nga ana fizike dhe psikologjike e skuadrës. Kuqeblutë kanë nisur kështu zyrtarisht javën “anti-Dinamo”, me një seancë stërvitore të zhvilluar në ritëm të lartë dhe me intensitet të plotë. Stafi teknik ka përqendruar punën kryesisht në aspektin fizik dhe taktik, ndërsa në ditët në vijim pritet të rritet edhe më shumë fokusi te përgatitja specifike për përballjen e radhës.
Lajm pozitiv për trajnerin Martini është fakti se grupi ka qenë pothuajse i plotë në stërvitje. Futbollistët janë paraqitur në gjendje të mirë fizike dhe me motivim maksimal për të vijuar punën, në një moment të rëndësishëm të sezonit ku çdo pikë ka peshë të madhe për objektivat e ekipit shkodran. E vetmja mungesë në seancën e parë të javës ka qenë sulmuesi, Lirim Kastrati, i cili vuan një dëmtim të pësuar në ndeshjen e fundit të kampionatit ndaj Egnatias, sfidë që u mbyll me rezultatin 0-0.
Gjendja e tij do të monitorohet nga stafi mjekësor në ditët në vijim, për të kuptuar nëse do të jetë i gatshëm për sfidën e ardhshme. Ndërkohë, në kampin kuqeblu mbizotëron optimizëm dhe përqendrim maksimal. Skuadra është e vendosur të shfrytëzojë sa më mirë ditët e përgatitjes për të ardhur në formën më të mirë të mundshme në përballjen ndaj Dinamos, një ndeshje që pritet të ketë rëndësi të veçantë për ecurinë e sezonit.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
