Edicioni i katërt i “Big Brother VIP Kosova” u mbyll me fitoren e Londrimit, duke shënuar një tjetër sezon të suksesshëm për formatin shumë të ndjekur në vend. Megjithatë, edhe pse finalja është ende e freskët në kujtesën e publikut, vëmendja tashmë është zhvendosur te ajo që pritet të vijë.
Menjëherë pas përfundimit të spektaklit, ndjekësit besnikë të “Big Brother VIP Kosova” kanë nisur të pyesin për edicionin e ardhshëm. Kurioziteti i tyre nuk ka munguar as në rrjetet sociale, ku pyetjet për sezonin e pestë janë bërë të shumta.
Moderatori i njohur, Alaudin Hamiti, është përballur drejtpërdrejt me këto pyetje gjatë një bashkëbisedimi virtual në Instagram. Një ndjekës e ka pyetur hapur: “A do të ketë BB5?”, duke kërkuar një konfirmim për vazhdimësinë e formatit.
Hamiti ka zgjedhur t’i përgjigjet me nota humori, duke lënë të kuptohet se ka nevojë për pak pushim pas intensitetit të sezonit të katërt.
“Më lëni pak të marr frymë prej BBK4 pastaj flasim për sezonin 5,” është shprehur fillimisht ai.
Megjithatë, moderatori ka dhënë edhe një sinjal të fortë për vazhdimin e spektaklit, duke shtuar:
“Duke marrë parasysh suksesin, impaktin dhe shikueshmërinë absolute që ka ky format, BIG-u i Kosovës me shumë gjasa do ta ketë sezonin tjetër, me ose pa mua.”
Edhe pse ende nuk ka një konfirmim zyrtar, deklarata e Hamitit ka rritur pritshmëritë për “Big Brother VIP Kosova 5”. Ajo që mbetet për t’u parë është nëse ai do të jetë sërish në rolin e moderatorit apo jo.
