Nga bojkoti, invadimi i fushës, kaosi, protestat, VAR dhe deri tek magjia. Në Afrikë, në botën e futbollit, kemi dëgjuar dhe parë histori nga më të çuditshmet, por e fundit është me të vërtetë e pabesueshme. Dy muaj pas përfundimit të Kupës së Afrikës, Federata Afrikane e Futbollit(CAF) bëri publike një vendim të Gjykatës së Apelit, me këtë të fundit që i heq titullin Senegalit për t’ia akorduar Marokut.
E besoni apo jo, por dy muaj pas finales që shkaktoi kaos dhe shumë debat, kurora e fituesit ndryshon pronar, tani kalon në Marok. Brahim Diaz me shokë shpërthyen në lot, por tani mbase kanë një arsye për të festuar pasi në letër janë ata fituesit e Kupës së Afrikës. Menjëherë pas përfundimit të finales, Federata e Futbollit të Marokut kishte apeluar në Komisionin e Disiplinës atë që prodhoi ajo sfidë, me këtë të fundit që e refuzoi, por Maroku nuk u dorëzua duke e dërguar çështjen në Apel.
https://www.youtube.com/watch?v=chuhAI45g70
Kjo e fundit pasi shqyrtoi të gjithë detajet doli në përfundim se Senegali gaboi duke u tërhequr nga fusha për disa minuta, shkeli rregullat e FIFA-s, dhe në këtë mënyrë humbet ndeshjen 3-0 në tavolinë.
Kjo mund të konsiderohet një fitore nga ana e Marokut, por çështja nuk pritet të përfundojë këtu pasi tani është radha e Senegal të apelojë këtë vendim, këtë herë duke e dërguar çështjen në CAS, në Gjykatën e Arbitrazhit Sportiv. Në pritje të një vendimi final, e vetmja që e sigurt është se në Afrikë, në futboll, mund të ndodhë gjithçka.
