Dua Lipa, ka folur hapur për mënyrën se si media ka trajtuar rastin e Jeffrey Epstein, duke kritikuar fuqishëm raportimin që, sipas saj, minon viktimat dhe e zbut seriozitetin e abuzimeve. Në një intervistë në ‘podcast’-in “Service95 Book Club” me shkrimtaren Roxane Gay, Lipa tha se media shpesh përdor gjuhë që e bën publikun të ndjehet larg nga dhuna dhe trauma që kanë përjetuar viktimat, duke i bërë ato të duken më pak serioze se sa janë në të vërtetë.
Ajo kritikoi veçanërisht mënyrën se si shumë artikuj përshkruajnë rastin, duke u fokusuar te “vajzat e mitura dhe festat seksuale”, në vend që të theksojnë faktin se bëhet fjalë për fëmijë që janë trafikuar dhe përdhunuar.
Sipas Lipës, kjo qasje ndryshon perceptimin e publikut, duke e bërë të vështirë për lexuesin të kuptojë pasojat e rënda të krimeve dhe duke i fshehur realitetin e dhunës që kanë përjetuar viktimat.
Artistja shtoi se kjo mënyrë raportimi krijon një ‘perde’ mbi ngjarjet, që duket se synon të mbrojë lexuesin nga e vërteta apo të maskojë seriozitetin e asaj që ka ndodhur.
Ajo e quajti këtë fenomen shqetësues dhe shtoi se media shpesh manipulon informacionin edhe në momentet më të errëta, duke ndryshuar mënyrën se si publiku e percepton situatën dhe duke e larguar vëmendjen nga viktimat.
Në thelb, Lipa bëri thirrje për një raportim më të ndershëm dhe të drejtpërdrejtë, që i jep viktimave vëmendjen dhe respektin që meritojnë, duke treguar ashpërsinë e krimeve të kryera nga Epstein.
