Sulmuesi 20-vjeçar i Vllaznisë, Kevin Dodaj, pritet të marrë një rol edhe më të rëndësishëm në javët e mbetura të sezonit. Kuqeblutë janë përballur me një goditje të rëndë në repartin ofensiv pas dëmtimit të Lirim Kastrati, i cili ka mbyllur para kohe sezonin.
Kjo situatë hap automatikisht më shumë hapësira për talentin shkodran, i cili tashmë shihet si një nga alternativat kryesore në sulmin e skuadrës. Me konfigurimin e ri taktik që pritet të përdorë trajneri, shumë gjasa ka që Esat Mala të aktivizohet në krahun e djathtë të mesfushës në ndeshjet e ardhshme. Një lëvizje e tillë do të thotë se në qendër të repartit ofensiv do të kërkohet një partner për kapitenin dhe bomberin e skuadrës, Bekim Balaj.
Në këtë pikë, gara për një vend titullari pritet të zhvillohet mes Dodajt dhe sulmuesit ganez Çarls Bismark. Megjithatë, forma e këtij të fundit ka qenë mjaft e paqëndrueshme gjatë këtij edicioni. Luhatjet në paraqitje kanë bërë që besimi ndaj tij të mos jetë gjithmonë maksimal, çka rrit shanset që Dodaj të marrë më shumë minuta në fushë. Për një futbollist të ri, i cili kërkon të konfirmohet në nivele të larta, kjo periudhë mund të jetë momenti ideal për të treguar potencialin e tij.
Dodaj u rikthye te Vllaznia në Shkodër gjatë merkatos së janarit në formën e huazimit nga CSKA Sofia. Një eksperiencë që, pavarësisht minutazhit jo shumë të madh, i ka shërbyer për të fituar më shumë pjekuri dhe eksperiencë. Deri më tani numri “22” ka zhvilluar 7 ndeshje me skuadrën e Martinit që prej rikthimit të tij në muajin janar.
Momenti më i spikatur i Dodajt në këtë sezon mbetet goli vendimtar në fitoren 2-1 ndaj Elbasanit, i realizuar në sekondat e fundit të javës së 24-t të kampionatit. Një gol që jo vetëm solli tre pikë të çmuara për kuqeblutë, por edhe një sinjal të qartë se sulmuesi i ri është gati të marrë më shumë përgjegjësi në repartin ofensiv të skuadrës shkodrane.
HUMBJA NË SHTËPI – Vllaznia vijon të konfirmojë forcën e saj në shtëpi, duke e kthyer stadiumin “Loro Boriçi” në një fortesë të vërtetë për kundërshtarët. Skuadra shkodrane po kalon një moment shumë pozitiv në ndeshjet e luajtura para tifozëve të saj, ku rezultatet e muajve të fundit flasin qartë për një ekip që di të shfrytëzojë maksimalisht avantazhin e fushës. Humbja e fundit e Vllaznisë në shtëpi daton më 28 nëntor 2025, kur kuqeblutë u mposhtën minimalisht 0-1 nga Teuta në javën e 13-të të Kategorisë Superiore.
Që prej atij momenti, skuadra shkodrane ka reaguar në mënyrën më të mirë të mundshme, duke mos njohur më humbje në impiantin e saj. Në total, pas asaj disfate, Vllaznia ka zhvilluar në “Loro Boriçi” nëntë ndeshje mes kampionatit dhe Kupës së Shqipërisë. Bilanci është mëse pozitiv: tetë fitore dhe vetëm një barazim. Një seri mbresëlënëse që tregon stabilitetin e ekipit dhe aftësinë për të dominuar ndeshjet në shtëpi, pavarësisht kundërshtarëve që ka pasur përballë. Këto shifra kanë rikthyer besimin dhe entuziazmin edhe te tifozët shkodranë, të cilët vazhdojnë të jenë një mbështetje e rëndësishme për skuadrën.
Atmosfera në “Loro Boriçi” ka qenë shpesh vendimtare, duke e bërë edhe më të vështirë për rivalët që të marrin pikë në Shkodër. Forma e mirë në shtëpi ka ndikuar ndjeshëm edhe në objektivat e skuadrës, me Vllazninë që kërkon të qëndrojë në zonat e larta të renditjes dhe të ruajë ritmin pozitiv në këtë fazë të kampionatit. Vazhdimësia në ndeshjet e luajtura në Shkodër mbetet një nga armët më të forta të ekipit kuqeblu.
Kjo seri pozitive do të vihet sërish në provë këtë të shtunë, kur në “Loro Boriçi” do të zbresë Dinamo, në sfidën e vlefshme për javën e 29-të të Kategorisë Superiore. Shkodranët synojnë të zgjasin edhe më tej pathyeshmërinë në shtëpi dhe të pasurojnë serinë e rezultateve pozitive para publikut të tyre.
