Raporti mes Selinit dhe Mateos duket se ka pësuar një krisje të fortë pas daljes së Gimbos nga shtëpia të martën, duke sjellë një tjetër përplasje në dinamikat mes banorëve. Situata u tensionua edhe më shumë gjatë debatit të zhvilluar në studio, ku ish-banori ndoqi drejtpërdrejt diskutimin mes partneres së tij dhe mikut të dikurshëm.
Gimbo nuk i kurseu kritikat ndaj Mateos, duke vënë në pikëpyetje qëndrimin dhe sinqeritetin e tij. Ai theksoi se disa deklarata dhe sjellje të Mateos do të duhej të ishin bërë në momentin kur ai ishte ende pjesë e shtëpisë, dhe jo pasi kishte dalë jashtë, duke lënë të kuptohet se koha e reagimit ka qenë e gabuar.
Sipas tij, nëse Mateo e konsideronte vërtet mik, duhet ta kishte treguar këtë në mënyrë të qartë dhe të drejtpërdrejtë edhe në mungesë të tij. Gimbo u shpreh se pasi ka dalë nga shtëpia, ka arritur ta shohë situatën më qartë dhe të kuptojë më mirë disa nga veprimet e ndodhura brenda.
Mateo ka vepruar shumë keq në disa situata. Tani që kam dalë jashtë e kam parë më mirë se kur isha brenda. Do ishte më mirë që Mateo këto muhabete t’i bënte sa isha unë ende në shtëpi dhe jo tani që kam dalë. Edhe nëse thotë që ‘Selin e kam përkrahur në lidhje me Gimbon’, duhet të kallzonte të njëjtën gjë dhe kur kam dalë unë. Shoku i mirë kallëzohet kur nuk është me ty!
