Zara Larsson ka zbuluar se ka humbur një marrëveshje të madhe prej 3 milionë dollarësh (rreth 2.7 milionë euro), pas një shakaje për abortin që publikoi në TikTok dhe që shkaktoi reagime të forta në rrjet.
Këngëtarja 28-vjeçare u përball me kritika të shumta online, por reagoi hapur duke sqaruar se nuk ka ndërmend të tërhiqet nga qëndrimet e saj. Në një deklaratë për mediat, ajo theksoi se nuk pendohet për atë që ka thënë dhe se humbja financiare nuk e ndryshon bindjen e saj për çështje të rëndësishme shoqërore.
“Dua të them, kohët e fundit, shakaja për abortin, e cila është shumë qesharake meqë ra fjala, humba një marrëveshje prej 3 milionë dollarëshe”.
Artistja vijoi duke bërë të qartë se për të, vlerat personale janë më të rëndësishme se çdo bashkëpunim biznesi. Ajo la të kuptohet se nuk do të pranonte të punonte me kompani që nuk ndajnë të njëjtin këndvështrim mbi të drejtat e grave.
Ajo shtoi: “Nëse nuk jeni dakord me mendimin tim që gratë duhet të kenë akses në abort ose që mund të bëjmë një bisedë shakaje për këtë, atëherë nuk jemi të destinuar të jemi partnerë”.
Këngëtarja theksoi se nuk ndikohet nga reagimet negative dhe mbetet e vendosur në bindjet e saj, pavarësisht pasojave financiare. Deklaratat e saj kanë ndezur një debat të gjerë në rrjet, duke rikthyer në vëmendje përplasjen mes qëndrimeve personale të artistëve dhe interesave komerciale të markave.
