Aktorja e njekohesisht fituesja e “BBVA”, Egla Ceno ka ndarë me ndjekësit një rrëfim në rrjetet sociale, duke zbuluar se ka përfunduar xhirimet për filmin “Përqafuesi”, ku interpreton rolin e saj të fundit në kinema.
Në mesazhin e saj, Ceno shprehet se ky projekt ka një rëndësi të veçantë për të, jo vetëm për shkak të rolit, por edhe për bashkëpunimin me aktorin Gaz Pajën dhe një ekip të ri artistësh, të cilët i cilëson si të përkushtuar dhe plot pasion për artin.
Megjithatë, aktorja ka marrë një vendim të rëndësishëm për jetën e saj personale dhe profesionale. Ajo ka njoftuar se do të tërhiqet nga vëmendja publike për një periudhë kohe, duke kërkuar mirëkuptim nga mediat dhe publiku.
Ceno tregon se po kalon një fazë të vështirë, e ndikuar nga probleme personale dhe shëndetësore në familje, konkretisht sëmundja e nënës së saj, që ka zgjatur prej disa muajsh. Për këtë arsye, ajo thekson se nuk ka më dëshirë të jetë “e fortë” në këtë moment të jetës dhe ka nevojë për qetësi.
Në fund të mesazhit, aktorja falënderon publikun dhe kolegët për mbështetjen e vazhdueshme, duke lënë të hapur mundësinë e një kapitulli të ri në të ardhmen.
