Departamenti Amerikan i Mbrojtjes po harton plane për ndërhyrje tokësore të kufizuara në Iran, të cilat mund të zgjasin disa javë, sipas zyrtarëve amerikanë që folën për Washington Post në kushte anonimiteti. Sipas tyre, operacionet nuk do të nënkuptojnë një pushtim të plotë, por do të përfshijnë bastisje të kontrolluara nga forcat e Operacioneve Speciale dhe trupat konvencionale të këmbësorisë.
Objektivat e mundshme përfshijnë Ishullin Kharg, qendër kyçe e eksportit të naftës iraniane, dhe zonat bregdetare pranë Ngushticës së Hormuzit, me qëllim neutralizimin e armëve që kërcënojnë lundrimin tregtar dhe ushtarak.
Presidenti Trump nuk ka miratuar ende ndonjë nga planet, ndërsa Sekretarja e Shtëpisë së Bardhë për shtyp, Karoline Leavitt, theksoi se roli i Pentagonit është të përgatisë opsionet dhe t’i sigurojë komandantit të përgjithshëm “mundësi maksimale opsionale”.
Më herët këtë javë, aeroplanmbajtësja USS Abraham Lincoln është bashkuar me USS Tripoli në rajon, duke sjellë mbi 3,500 marinarë dhe marinsat amerikanë, avionë transporti dhe sulmi, si dhe anije amfibe të tjera. Një grup tjetër, përbërë nga USS Boxer, USS Comstock dhe USS Portland, po lëviz gjithashtu drejt rajonit. Një grup i tretë aeroplanmbajtësish është vendosur për t’u bashkuar në operacionet e ardhshme.
Muajin e kaluar, dy grupe sulmuese të aeroplanmbajtësve, të udhëhequra nga USS Gerald R. Ford dhe USS Abraham Lincoln, ndërhynë në objektiva të caktuara në Iran. USS Ford pësoi një zjarr të dyshuar jo-luftarak dhe u tërhoq për riparime në Kretë, ndërsa rikthimi i tij në operacione mbetet i pasigurt.
