Organizatorët e Eurovision 2026 kanë publikuar renditjen zyrtare të paraqitjes për dy gjysmëfinalet, që do të zhvillohen këtë vit në Vjenë, Austri. Sipas njoftimit, Gjysmëfinalja e parë është caktuar për 12 maj, Gjysmëfinalja e dytë më 14 maj, ndërsa Finalja e Madhe do të mbahet më 16 maj. Një nga risitë e këtij edicioni është rikthimi i jurive profesionale në gjysmëfinale, përveç televotimit të publikut, praktikë e cila nuk ishte aplikuar që nga viti 2022.
Gjatë dy netëve të gjysmëfinaleve do të performojnë edhe vendet e njohura si “Big 5” – Franca, Gjermania, Italia dhe Mbretëria e Bashkuar – si dhe Austria si vend pritës. Këto vende kualifikohen automatikisht në finale, por do të jenë prezentë në skenë edhe gjatë gjysmëfinaleve.
Shqipëria do të performojë në Gjysmëfinalen e dytë, në pozicionin e 13-të, duke prezantuar këngën e përzgjedhur nga artisti Alis me titullin “Nân”. Konkurrenca në këtë gjysmëfinale do të jetë e fortë, me artistë nga Bullgaria, Azerbajxhani, Rumania, Luksemburgu, Çekia, Armenia, Zvicra, Qiproja, Austria, Letonia, Danimarka, Australia, Ukraina dhe Malta.
Gjysmëfinalja e parë do të përfshijë vende si Moldova, Suedia, Kroacia, Greqia, Portugalia, Gjeorgjia, Finlanda, Mali i Zi, Estonia, Izraeli, Belgjika, Lituania, San Marino, Polonia dhe Serbia, ndërsa në këtë natë do të performojnë edhe Italia dhe Gjermania nga “Big 5”.
Publiku dhe fansat e Eurovision tashmë presin me padurim të shohin performancat, ndërsa rikthimi i jurive profesionale dhe pjesëmarrja e vendit pritës pritet të sjellë emocione të forta dhe surpriza gjatë dy netëve të gjysmëfinaleve. Finalja më 16 maj premton një spektakël të paharrueshëm.
