Atmosfera në shtëpinë e Big Brother VIP Albania po bëhet gjithnjë e më e tensionuar, teksa debatet dhe strategjitë mes banorëve po marrin një tjetër dimension në prag të finales. Aleancat duken të brishta dhe çdo deklaratë po shndërrohet në një lëvizje të mirëkalkuluar loje.
Në qendër të vëmendjes ka qenë së fundmi Rogerti, i cili ka bërë një deklaratë të fortë ndaj Mirit, duke tronditur balancat brenda shtëpisë. “Nuk e dua Mirin në finale”, është shprehur ai, duke e bërë të qartë pozicionin e tij strategjik.
Rogerti ka vijuar më tej me një analizë të drejtpërdrejtë të lojës, duke theksuar: “Më pëlqeu sot sepse filloi të sulmonte, pastaj u ndal. Unë Mirin e përballoj. Ne, nëse rrimë bashkë, rrimë sepse kemi një kundërshtar që është filania. Kundërshtari i vërtetë është Miri. Nëse shkoj unë në finale, dua ta heq në gjysmëfinale. Dhe si bëhet kjo gjë? Duke shkuar kokë më kokë. Mirin e konsideroj lojtarin më të fortë dhe është më mirë ta eliminoj në gjysmëfinale. Çfarë do Miri në finale kot? Nuk e duan në finale, pse të mos e heq dhe të përfitoj nga votat e fansave të tij? Unë dua ta sfidoj Mirin në gjysmëfinale”.
Kjo deklaratë ka nxitur reagime edhe jashtë shtëpisë. Opinionisti Arbër Hajdari ka komentuar strategjinë e Rogertit, duke vënë në dyshim qasjen e tij. “Nuk mendoj se Rogerti nuk i mendon këto gjëra. Ai prodhon pushtet nga hiçi. Është lojtar që e njeh lojën, por ka disa ditë që është i turbullt. Nuk e do sherrin, përplasjen me Mirin; po ta donte, ai çohej dhe e përballte vetë. Llogaritë po i dalin pak keq”, u shpreh ai.
