Nga lot hidhërimi në lot gëzimi. Brenda pak ditësh Vedat Muriqi përjeton emocione miks, fillimisht u eliminua me Kosovën në fazën finale të “play-off”, ndërsa pak ditë më pas i dhuron Mallorca një fitore të madhe përballë Real Madrid. “Bomberi” dardan vërtetoi edhe një herë se është një sulmues klasi dhe një bekim për ekipin e tij. Jo vetëm kaq, por Muriqi i dhuron një asist në distancë edhe Barçës duke frenuar Realin në garën për titull.
Me mendje te Bayern në Champions, Arbeloa vendosi të kursente disa nga yjet e ekipit, por në fundin e pjesë e gjetën veten në dizavantazh me Morlanes në minutën e 41-të. Me fraksionin e dytë, Arbeloa hodhi në fushë lojtarë si Militao, Bellinghan e Vinicius dhe ishte pikërisht qendërmbrojtësi brazilian që me kokë në minutën e 88-të barazoi shifrat në 1-1. Atëherë kur të gjithë prisnin që Reali të përmbyste shifrat, ishte Mallorca që i goditi. Në minutën e 91-të, Muriqi mori një top të pastër në zonë dhe me një goditje të bukur tundi rrjetën duke bërë që stadiumi të shpërthente në festë. Ky gol trepikësh i Vedat Muriqit përballë Real Madrid mban të gjallë objektivin e Mallorca për të mbijetuar në La Liga.
Pas ndeshjes, sulmuesi i Kosovës zbuloi emocionet e tij pas kësaj fitoreje të madhe: “Kam përjetuar një dyjavësh të vështirë, me emocione dhe nerva, jam njeri edhe unë. Fillimisht humbja një penallti ndaj Elche, më pas humba finalen e play-off për të shkuar në Botëror me Kosovën, ëndrra e jetës time. Sot erdhi ky gol, kjo fitore 2-1. Falënderoj tifozët për mbështetjen, shpresoj të qëndrojmë në La Liga”, u shpreh Muriqi pas ndeshjes.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
