Ferrari në aksion: Luis xhiron në shi, Leclerc në simulator

Ferrari është një nga skuadrat e pakta që po zhvillon aktivitet intensiv në pistë gjatë pushimit të detyrueshëm të Formula 1. Skuderia italiane ka përfituar nga fakti që testet e Pirelli në kushte shiu, të cilat do t’i shërbejnë prodhuesit të gomave për zhvillimin e gomave të lagështa për sezonin 2027, po zhvillohen pikërisht në këtë periudhë.

Luis Hamilton përfundoi të premten dy ditë testimesh. Shtatë herë kampioni i botës realizoi 142 xhiro (423 km) të enjten me SF-26 dhe u rikthye sërish në pistë edhe dje. Pirelli konfirmoi se Hamilton regjistroi kohën më të shpejtë prej 1:01.031 në ditën e parë të testimeve në pistën private të Ferrarit në Fiorano.

“Hamilton përfundoi 142 xhiro në pistën private të Ferrarit, duke përshkuar gjithsej 423 kilometra, ndërsa testonte konfigurime të ndryshme të gomave për shi të dendur gjatë mëngjesit dhe deri në orët e para të pasdites. Programi u mbyll me disa seri provash me variante të ndryshme të gomave intermediare për të përfunduar ditën”, njoftoi Pirelli. Shoku i tij i skuadrës, Sharl Lëklerk, nuk mori pjesë në testime në pistë dhe u fokusua në punën me simulatorin.

Pa pjesë të reja, por me prova në motor

Testet e Pirelli zhvillohen me makinat aktuale, pasi ato të vitit 2025 nuk janë të përshtatshme për këto prova, për shkak të ndryshimeve në dimensione, peshë dhe mënyrën e transmetimit të fuqisë. Në parim, nuk lejohet instalimi i pjesëve të reja krahasuar me ato të përdorura në Çmimin e Madh të Japonisë, por është shumë e mundshme që skuadra të ketë testuar konfigurime të ndryshme të motorit dhe shpërndarjes së energjisë elektrike, elemente që mund të përdoren në garat e ardhshme të kampionatit botëror.

Këto testime u shërbejnë gjithashtu pilotëve për të ruajtur ritmin dhe për t’u përgatitur në rast se ndonjë garë zhvillohet në kushte shiu gjatë sezonit. Pjesëmarrja e Ferrarit erdhi pas testimeve të gomave nga Red Bull dhe Racing Bulls, të zhvilluara pas Çmimit të Madh të Japonisë. Ndërkohë, MekLaren do të kryejë testime të ngjashme javën e ardhshme.

© BalkanWeb