Lista e golashënuesve të Tiranës për sezonin 2025/26 nxjerr në pah një tjetër problem të madh të bardhebluve: mungesën e një sulmuesi dominues që të bëjë diferencën në mënyrë të vazhdueshme.
Në krye të renditjes qëndron Serzh Tabeku me 8 gola, duke qenë pika kryesore e referimit në repartin ofensiv. Megjithatë, mesatarja e tij prej 0.4 golash për ndeshje nuk është në nivelet e një “bomberi” që garanton titull. Pas tij vjen Redon Xhixha me 5 gola dhe një mesatare më të lartë realizimi (0.6), çka tregon se sulmuesi ka efikasitet, por jo vazhdimësinë e nevojshme gjatë gjithë sezonit.
Kontributi i pjesës tjetër të skuadrës mbetet i shpërndarë dhe relativisht i ulët. Silva ka shënuar 3 gola, ndërsa një grup i gjerë lojtarësh si Ndong, Falaje, Zhunior, Mysloviç dhe Patsatsia kanë realizuar nga 2 gola secili. Lista mbyllet me Rodriguez dhe Tare, të cilët kanë gjetur rrugën e rrjetës vetëm nga një herë.
Kjo shpërndarje tregon qartë se Tirana nuk ka një lider absolut në sulm, por varet nga disa lojtarë që kontribuojnë në mënyrë sporadike. Në pamje të parë kjo mund të duket si një avantazh, por në realitet mungesa e një goleadori konstant penalizon skuadrën në ndeshjet vendimtare. Nëse bardheblutë synojnë të rrisin ndjeshëm rendimentin ofensiv, gjetja ose “zgjimi” i një sulmuesi që garanton shifra të larta golash mbetet një domosdoshmëri.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
