Bleona Qereti ka qenë pjesë e një prej eventeve më të rëndësishme të elitës mediatike dhe politike në Shtetet e Bashkuara, por mbrëmja që pritej të ishte festive mori një kthesë të papritur. Artistja mori pjesë në Darkën e Korrespondentëve në Uashington, një organizim i përvitshëm i White House Correspondents’ Association, që mbledh figura të njohura nga politika, media dhe showbizi.
Megjithatë, atmosfera glamuroze e tapetit të kuq u tensionua pas raportimeve për të shtëna pranë hotelit ku po zhvillohej ceremonia, duke krijuar panik dhe pasiguri mes të pranishmëve. Si pasojë e situatës, organizatorët u detyruan të marrin masa dhe eventi pritet të riplanifikohet.
Në mes të këtij zhvillimi dramatik, Bleona ndau me ndjekësit e saj në Instagram një moment nga mbrëmja, ku shfaqet elegante në tapetin e kuq. Krahas fotos, ajo shkroi: “Pushtet, politikë dhe rrobaqepësi precize. Darka e mbrëmshme e Korrespondentëve të Shtëpisë së Bardhë (tani do të riplanifikohet)”, duke lënë të kuptohet edhe për situatën e papritur që përfshiu eventin.
Ndërkohë, presidenti i SHBA-së Donald Trump reagoi përmes një konference për media, ku deklaroi se beson që incidenti ishte vepër e një “ujku të vetmuar”, duke përjashtuar për momentin mundësinë e një sulmi të organizuar më të gjerë.
Ngjarja ka rikthyer edhe një herë vëmendjen tek çështjet e sigurisë në evente të mëdha publike në SHBA, ndërsa detaje të mëtejshme mbi incidentin pritet të dalin në vijim.
