Katër dekada pas katastrofës bërthamore në Çernobil, Zona e Përjashtimit është shndërruar në një nga rastet më të pazakonta ekologjike në botë, ku natyra duket se ka marrë sërish kontrollin, pavarësisht nivelit të lartë të ndotjes radioaktive.
Sipas studiuesve, në këtë territor është vërejtur një rritje e dukshme e popullatave të disa specieve të kafshëve të egra. Largimi i njerëzve nga zona ka krijuar një hapësirë pa aktivitet njerëzor, pa bujqësi, ndërtim apo gjueti, duke i lejuar ekosistemit të rigjenerohet në mënyrë të papritur.
Shkencëtarët e cilësojnë këtë fenomen si një “paradoks ekologjik”: nga njëra anë, zona mbetet ndër më të kontaminuarat në Evropë, ndërsa nga ana tjetër është kthyer në një strehë për faunën e egër që është rikthyer dhe është shtuar ndjeshëm në numër.
Megjithatë, kërkimet shkencore tregojnë se rrezatimi nuk ka kaluar pa pasoja. Në disa specie, veçanërisht te zogjtë dhe bimët, janë evidentuar ndryshime gjenetike dhe dëmtime në ADN, duke ngritur pikëpyetje mbi efektet afatgjata të ekspozimit ndaj radioaktivitetit. Pavarësisht kësaj, shumë ekspertë theksojnë se mungesa e aktivitetit njerëzor ka qenë faktori kryesor që ka lejuar rikthimin e jetës së egër në këtë zonë, duke e kthyer Çernobilin në një laborator unik natyror për studimin e ekosistemeve në kushte ekstreme.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
