Todoroski mbyll sezonin, Flamurtari me mungesë të rëndësishme ndaj Dinamos

Flamurtari merr një lajm aspak pozitiv në prag të përballjes së rëndësishme ndaj Dinamos në Vlorë. Mbrojtësi maqedonas Todor Todoroski ka mbyllur para kohe sezonin, pas dëmtimit të rëndë të pësuar në sfidën ndaj Egnatia.

Sipas burimeve të “Panorama Sport”, futbollisti ka pësuar këputje të ligamentit kryqëzor anterior në gju, një nga dëmtimet më serioze për një sportist. Lloji i dëmtimit lidhet drejtpërdrejt me intensitetin e traumës dhe pritet të konfirmohet përfundimisht pas ekzaminimeve të detajuara me rezonancë magnetike.

Gjithsesi, diagnoza paraprake ka qenë e mjaftueshme për të përcaktuar se sezoni i Todoroskit ka përfunduar, ndërsa ndërhyrja kirurgjikale shihet si e pashmangshme. Momenti i dëmtimit erdhi në minutën e 19-të të ndeshjes kundër Egnatias, kur loja u ndërpre për disa minuta. Stafi mjekësor ndërhyri menjëherë dhe pasi konstatoi pamundësinë e lojtarit për të vijuar, kërkoi zëvendësimin e tij. Todoroski u largua nga fusha me barelë, mes shqetësimit të stafit dhe tifozëve, ndërsa në vend të tij u aktivizua Rramani.

DINAMO DHE OBJEKTIVI – Pavarësisht kësaj goditjeje, në kampin kuqezi fokusi mbetet i pandryshuar: fitorja ndaj Dinamos. Drejtuesit e klubit kanë qenë të prerë me stafin teknik, duke kërkuar vetëm tri pikët nga kjo përballje. Presidenti Sinan Idrizi nuk ka kursyer motivimin financiar për skuadrën, duke vendosur një premio të veçantë për këtë ndeshje, shuma e së cilës është mbajtur surprizë. Në funksion të përgatitjes dhe për të shmangur presionin e ambientit, skuadra është grumbulluar në një resort pranë Orikumit, ku do të qëndrojë deri në orët e fundit para sfidës.

MBËSHTETJA E TIFOZËVE- Mësohet se pritet një prani e konsiderueshme tifozësh në stadiumin e Vlorës. Klubi ka bërë thirrje të hapur për mbështetje, duke theksuar se “në orën 19:00 të gjitha rrugët të çojnë në stadiumin ‘Flamurtari’”. Interesi është i lartë dhe çmimet e biletave janë bërë publike: 1500 lekë për tribunën qendrore, 300 lekë për tribunat A, B dhe C, si dhe 500 lekë për tribunën D të miqve. Në një moment delikat të sezonit, Flamurtari kërkon reagim në fushë dhe mbështetje maksimale nga shkallët, për të kaluar një pengesë të rëndësishme si Dinamo dhe pa një nga titullarët e tij në mbrojtje.

© BalkanWeb